بە فەرمانی سوودانی لەمەودوا لێکۆڵینەوە لەگەڵ تۆمەتباران بە کامێرا تۆمار دەکرێت

ئاڤا نیوز

دوای دۆسیەی گیانلەدەستدانی ئەندازیارەکەی بەغدا لە زیندان، سەرۆکوەزیرانی عێراق فەرمانێکی دەرکرد بۆ تۆمارکردنی لێکۆڵینەوەکان لەگەڵ تۆمەتباران بە کامێرا.

چیرۆکی سەرەکی: لە ماوەی ڕابردوودا، ئەندازیار بەشیر خالید لەگەڵ ئەفسەرێکی وەزارەتی ناوخۆی عێراق بە پلەی لیوا توشی ناکۆکی بوو بوو، دەستگیرکرا و لە زیندان ئەشکەنجەیەکی زۆر درا، سەرلەبەیانی 7ـی نیسان لە نەخۆشخانەیەکی بەغدا گیانی لەدەستدا و ئەوەش کاردانەوەیەکی زۆری بەدوای خۆیدا هێنا و لەسەر فەرمانی سوودانی لیژنەیەکی باڵای لێکۆڵینەوە لەوبارەیەوە پێکهێنرا.

نووسراوی فەرمی: محەممەد شیاع سوودانی، سەرۆکوەزیران و فەرماندەی گشتیی هێزە چەکدارەکانی عێراق لە نووسراوێکدا فەرمانی بە هەردوو وەزارەتی بەرگری و ناوخۆ و دەزگای هەواڵگریی نیشتیمانی و دەزگای ئاسایشی نیشتیمانی کردووە، دەبێت لە سەرجەم فەرمانگەکانی پۆلیس و ناوەندەکانی لێکۆڵینەوە لە کاتی لێکۆڵینەوە لەگەڵ تۆمەتباران کامێرا دابنرێت و تۆمار بکرێت.