فیدان و عێراقچی تاوتوێی دانوستانەکەی عومان دەکەن

ئاڤا نیوز

 

هاکان فیدان، وەزیری دەرەوەی تورکیا لەگەڵ هاوتا ئێرانییەکەی عەباس عێراقچی، پەیوەندییەکی تەلەفۆنییان ئەنجامدا و ناوەرۆکی دانوستانی عومانیان تاوتوێ کرد. 

 

وێنە گەورەکە:  ڕۆژی شەممە یەکەم خولی دانوستانی ناڕاستەوخۆ لە نێوان ئەمریکا و ئێران لە شاری مەسقەت لە عومان بەڕێوەچوو و بڕیارە دووەم خولی دانوستانەکان هەفتەی داهاتوو ئەنجام بدەن.

 

ڕاگەیێنراویی فەرمی: وەزارەتی دەرەوەی تورکیا ڕایگەیاند، هاکان فیدان لە پەیوەندییە تەلەفۆنیدا لەگەڵ عێراقچی وردەکاریی کۆبوونەوەکەی هەفتەی ڕابردووی عومانیان تاوتوێکردووە، کە لە نێوان شاندی دانوستانکاری ئێران و ئەمریکا بەڕێوەچوو، هەروەها پرۆگرامی وزەی ئەتۆمی ئێران و پرسە ناوچەییەکانیش باس کراوە.

 

زانیاریی زیاتر: هەر ئەمڕۆ دووشەممە ئیسماعیل بەقائی، وتەبێژی وەزارەتی دەرەوەی ئێران لەبارەی شوێنی خولی دووەمی دانوستان ڕایگەیاندووە: "دوای ڕاوێژکردن  بڕیاردرا 19ـی نیسان خولی دووەمی دانوستانەکان لە پایتەختی عومان بەڕێوەبچێت".

 

لەلایەکی دیکەوە: هاوکات ئەنتۆنیۆ تاجانی، وەزیری دەرەوەی ئیتاڵیا پێشتر ڕایگەیاندبوو، دووەم خولی دانوستانەکان لە ڕۆمای پایتەختی ئیتاڵیا بەڕێوەدەچێت.