بۆ گەرەنتی دابینکردنی مووچە ڕاوێژکارێکی سوودانی داوای سیاسەتی "سک هەڵگوشین" دەکات

ئاڤا نیوز

ڕاوێژکاری سەرۆکوەزیرانی عێراق بۆ کاروباری ئابووری دەڵێت، بۆ ئەوەی حکومەت بتوانێت پارە بۆ خەرجییە ڕاستەقینەکان و بەتایبەت مووچە گەرەنتیی بکات، پێویستە سیاسەتی کەمترین خەرجیی و زۆرترین داهات لە خشتەی بودجەی ئەمساڵدا جێبەجێ بکرێت.

وێنە گەورەکە: بەهۆی ناجێگیریی نرخی نەوت و گۆڕانکارییە خێراکانی دۆخی ئابووری لە ئاستی جیهاندا، تا ئێستا حکومەتی عێراق خشتەی بودجەی بۆ ساڵی 2025 ڕەوانەی پەرلەمان نەکردووە، بەرپرسانی حکومەتیش بەبێ ئەوەی کێشەی پارەی نەختینە ڕەتبکەنەوە، دەڵێن، مووچە گەرەنتیکراوە و هیچ گرفتێکیان نییە.

لێدوانی فەرمی: مەزهەر محەممەد ساڵح، ڕاوێژکاری سەرۆکوەزیرانی عێراق بۆ کاروباری ئابووری لە چاوپێکەوتنێکدا ئەوەی خستووەتەڕوو، خشتەی بودجەی ساڵی 2025 کە ئێستا ئامادە دەکرێت و دەخرێتە بەردەم پەرلەمان، دەبێت ڕەنگدانەوەی دۆخی ئێستای ئابووریی نێودەوڵەتی بێت و ناجێگیرییە سیاسیی و ئابوورییەکان تێیدا ڕەچاو دەکرێت، بۆیەش "دەبێت بە وردی پێداچوونەوە بە خەرجییەکاندا بکەین و بنەمای کەمترین خەرجیی و زۆرترین داهات جێبەجێ بکەین، بۆ ئەوەی بتوانین گەرەنتی خەرجی ڕاستەقینە بکەین، لەوانەش دابینکردنی مووچە".

بەشێکی دیکە لە قسەکانی مەزهەر محەممەد ساڵح، ڕاوێژکاری سەرۆکوەزیرانی عێراق بۆ کاروباری ئابووری:

٠ کورتهێنان لە یاسای بوجەی سێ ساڵەدا لە سنووری زۆرترین خەرجی دایە.

٠ یاسای بودجە بەجۆرێک داڕێژراوە کە لە ڕووی ئابوورییەوە دەرفەتی ئەوەی تێدایە سیاسەتی لەپێشینە بگۆڕێت (لەوانەش خەرجی گشتی، باج  و ئاستی پشتگیرییەکان) ئەویش بۆ بەدیهێنانی ئامانجە ئابووریی و کۆمەڵایەتییەکان.

٠ هەوڵدراوە مامەڵە لەگەڵ یاسای بودجەدا بکەین بە سنووری کەمترین ڕێژەی کورتهێنان، لەگەڵ ئەوەشدا زۆرترین کورتهێنانی ساڵانەی بودجە 64 ترليۆن دينارە لەکۆی 200 ترليۆن دينار، ئەویش بە بەرهەمی ڕۆژانەی سێ ملیۆن و 400 هەزار بەرمیل نەوت و بەتێکڕای فرۆشتنی هەر بەرمیلێک نەوت بە 70 دۆلار.

٠ ساڵی ڕابردوو ئاستی خەرجییەکانمان 156 ترلیۆن دینار بووە و بەتێکڕاش هەر بەرمیلێک نەوت بە 75 دۆلار فرۆشراوە، ئەوەش مانای وایە بۆ پڕکردنەوەی کورتهێنان بڕێکی کەم قەرز لە ناوخۆدا کراوە.