حکومەتی هەرێمی کوردستان نیگەرانە لە بانکی بازرگانیی عێراق

ئاڤا نیوز

 

بانکی بازرگانیی عێراق لە هەرێمی کوردستان لە چوارچێوەی پڕۆژەی هەژماری من 40 هەزار هاوبەشی هەیە، بەڵام تاوەکو ئێستا هیچ ئامێرێکی ڕاکێشانی پارەی نییە و حکومەتی هەرێمی کوردستانیش لەوبارەیەوە نیگەرانە. 

 

وێنە گەورەکە: هەژماری من خزمەتگوزارییەکی بەبانکی کردنی مووچەی مووچەخۆرانی هەرێمی کوردستان و تاوەکو ئێستا هەشت بانکی باوەڕپێکراو لە چوارچێوەی پڕۆژەکەدا خۆیان تۆمار کردووە، هاوکات بەشێکی زۆر لەوبانکانە لە تەواوی شارەکانی کوردستان ئامێری ڕاکێشانی پارەیان داناوە.

 

لێدوانی فەرمی: عەزیز ئەحمەد، جێگری بەڕێوبەری نووسینگەی سەرۆکوەزیران، ڕایگەیاند، ئێمە نیگەرانین لەوەی بانکی بازرگانی عێراق ساڵیک لەمەوبەر بەڵێنیدا کە 100 ئامێری نوێی  ATM لە تەواوی شارەکان دابنێت بەڵام تاوەکو ئێستا نەچووەتە بواری جێبەجێکردنەوە. 

 

زانیاریی زیاتر: تاوەکو ئێستا ئەو بانکە  40 هەزار هاوبەشی هەیە و سەرەڕای داواکارییان بەڵام تاوەکو ئێستا ئەو بانکە هیچ ئامێرێکی ATM نەکڕیوە، سەرەڕای ئەوەش کارتی بانکی ژمارەیەکی دیکە لە فەرمانبەران کە مامەڵەکانیان تەواوکراوە تاوەکو ئێستا نەگەڕاوەتەوە. 

 

- هەرێمی کوردستان نیگەرانی خۆی گەیاندووەتە بانکی ناوەندی و وەزارەتی دارایی عێراق.