‌ درووزه‌كانی ئیسرائیل هەڕەشە لە حکومەتی سووریا دەکەن؛ گۆڕانكاری نزیكه

ئاڤا نیوز

ئه‌مڕۆ له‌ ميديا عەرەبی و تۆڕه‌ كۆمه‌ڵایه‌تییه‌كان ‌گرته‌یه‌كی‌ ڤیدیۆیی رێبه‌ری ڕۆحی درووزه‌كانی ئیسرائیل بڵاوبووەتەوە و لێدوانێکی مەترسیدار سەبارەت بە سووریا دەدات.

بینراو و بیستراو: وەک لەگرتە ڤیدیۆکەدا دیارە، مۆفق ته‌ریف، ڕێبه‌ری ڕۆحی درووزه‌كانی ئیسرائیل بەزمانی عەرەبی دەڵێت، " بنیامین نەتانیاهۆ سه‌رۆك وه‌زیرانی‌ ئیسرائیل ڕێنمایی سه‌باره‌ت به‌ دۆخی سووریا ده‌ركردووه‌ و گۆڕانكاریی نزیكه و داوا له‌ درووزەکان دەکات خۆڕاگربن.

هەر لەگرتە ڤیدیۆکەدا ڕێبه‌ری ڕۆحی دروزه‌كانی ئیسرائیل ده‌ڵێت: سوپای ئیسرائیل و هەموو جیهان پاڵپشتی ئێمە دەکەن و لەگەڵماندان و ڕێگه‌ به‌ هیچ كه‌س و لایەنێک ناده‌ین زیان به‌ درووز بگه‌یه‌نێت.

ئەوەی پێویستە بیزانیت: هەرئەمڕۆش‌ شەڕ و ڕووبەڕووبوونەوەی گرووپێکی چەکداری درووزییەکان لەگەڵ هێزە ئەمنییەکانی سووریا لە چەند ناوچەیەکی ڕیفی دیمەشق ڕوویدا و ئیسرائیلیش وەک پاڵپشتییەک بۆ درووزەکان لە ڕێگەی هێرشی ئاسمانییەوە هێزە ئەمنییەکانی سووریای کردە ئامانج.