پاکستان: بە مەرج ئامادەی ڕاگرتنی هێرش و ئاڵۆزییەکانین

ئاڤا نیوز

دوای ئاڵۆزی و هێرشەکانی هیندستان و پاکستان بۆ سەر یەکتری، وەزیری بەرگریی پاکستان ڕایدەگەیێنێت، "ئامادەی ڕاگرتنی هێرشەکان و دەستپێکردنی گفتوگۆین، بەڵام مەرجمان هەیە".

وێنەگەورەکە: شەوی سێشەممە، هیندستان چەند هێرشێکی مووشەکی کردە سەر پاکستان و دەیان کوژراو و برینداری لێکەوتەوە، هەر دوای هێرشەکانی هیندستانیش، پاکستان لە وەڵامدا هێرشی بۆ سەر هەرێمی کشمیری ژێر دەسەڵاتی هیندستان دەستپێکرد و بەمەش شەڕ و ناکۆکی هەردوو وڵات چووە قۆناغێکی نوێوە و مەترسییەکان بۆ هەڵگیرسانی جەنگێکی دیکە لە ناوچەکە زیاتر بوون.

لێدوانی فەرمی: خواجە محەممەد ئاسیف، وەزیری بەرگری پاکستان ڕایگەیاند، "ئیسلام ئاباد ئامادەیە کۆتایی بە چالاکییە سەربازییەکانی دژی هیندستان بهێنێت، بە مەرجێک ئەگەر نیودەلهی پاشەکشە بکات".

خواجە گوتیشی، "ئامادەین بۆ گفتوگۆکردن لەگەڵ هیندستان".

ئەوەی پێویستە بیزانیت: دوێنێ پاکستان لە ئەنجوومەنی ئاسایشی نەتەوە یەکگرتووەکانی لە مافی خۆی بۆ وەڵامدانەوەی هێرشەکانی هیندستان ئاگادار کردبووەوە.