وەزیری پەروەردە: هەر قوتابییەك وێنەی پرسیارەكانی پۆلی 12 بگرێت بە دوو خولەك ئاشكرای دەكەین

ئاڤا نیوز

وەزیری پەروەردەی حكومەتی هەرێمی كوردستان دەڵێت سكویریتی پرسیاری تاقیكردنەوەكانی ئەمساڵی پۆلی 12 بەهێزە گزیی لێكردنی ئەستەمە هەر كەسێكیش بیكات زوو ئاشكرا دەكرێت و ڕێوشوێنی تووند بەرامبەرت دەگیرێتە بەر.

وێنە گەورەکە: ئەمساڵ 115 هەزار و 862 قوتابیی پۆلی 12 بە قوتابیانی دەرەكی و پیشەییەكانیشەوە مافی بەشدارییان لە تاقیكردنەوەكان هەیە و بەپێی گوتەی بەرپرسانی وەزارەتی پەروەردەش ڕەنگە بە هۆی بەشدارینەكردنی بەشێك لە قوتابیان ژمارەكە كەم بێتەوە.

لێدوانی فەرمی: ئالان حەمە سەعید، وەزیری پەروەردەی حكومەتی هەرێمی كوردستان لە كۆنفڕانسێكی ڕۆژنامەوانیدا ڕایگەیاند:

٠ 1ـی 6 تاقیكردنەوەكانی پۆلی 12 ئەنجام دەدرێن، هیوادارم هیچ قوتابییەك فریو نەخوات بە باندەكانی گزیكردن، چونكە چارەنووسی هەموویان ڕووبەڕووكردنەوەی یاسایە.

٠ دامەزراوە ئەمنییەكان بۆ ڕێگریكردن لە گزیكردن هاوكاری وەزارەتی پەروەردەن، ساڵانی ڕابردووش توانراوە لەو چوارچێوەیە كاری زۆر باش بكرێت، سكویریتی پرسیارەكانی ئێمە بەهێزە ئەگەر یەكێك توانیبێتی مۆبایل لەگەڵ خۆی بباتە ژوورەوە و بیەوێت وێنەیەكی پرسیاری تاقیكردنەوەكان بگرێت و بۆ كەسێكی بنێرێت یان لە سۆشیال میدیا بڵاوی بكاتەوە ئەوا تەنیا بە دوو دەقەی شوێن و ناوەكەی ئاشكرا دەكەین و ڕێوشوێنی پێویستی لەبەرامبەر دەگرینە بەر.