لە دەریای ئیجە 22 کۆچبەر گیانیان لە دەست دا

ئاڤا نیوز

 

بەرەبەیانی ئەمڕۆ بەلەمێك كە ژمارەیەك كۆچبەری لە توركیاوە بۆ یۆنان دەگواستەوە ژێرئاو کەوت و بەهۆیەوە 22 كۆچبەر گیانیان لەدەستدا کە حەوتیان منداڵن.

 

وێنە گەورەكە: بەلەمەكە لە ناوچەیەك بووە لە شارۆچكەی ئێجەئابات لە پارێزگای چاناككالە و ژمارەیەكی زۆر کۆچبەری لەسەر بووە، تا ئێستا ناسنامەیان دیاری نەكراوە. 

 

لێدوانە فەرمییەکان: "بەپێی زانیارییەكانی ئێمە 22 کۆچبەر خنكاون، حەوتیان منداڵن و تەرمەكانیان گواستراوەتەوە بۆ پزیشكی دادی، دوو کۆچبەریش لە مردن ڕزگاریان بووە و تا ئێستا ناسنامەیان دیارنییە"، دەشتی جەمال، سكرتێری فیدراسیۆنی سەرانسەری پەنابەرانی عێراق ئەمەی بە ئاڤا نیوز گوت.

 

لەلایەکی دیکەوە: ئیلهامی ئاکتاش، پارێزگاری چاناککالە ڕایگەیاند، هەوڵەكان بەردەوامن بۆ دۆزینەوەی کۆچبەرەکان و پۆلیس لە دەریادا بەدوای تەرمی دیکەدا دەگەڕێت.

 

ئەوەی پێویستە بیزانیت: پۆلیسی دەریایی توركیا  دە بەلەم و دوو هێلیكۆپتەر و نزیكەی 100 كارمەندی خستووەتە ئەرکەوە بۆ دۆزینەوەی تەرمەكان.

 

زانیاری زیاتر: بەلەمەكە بچووك بووە لە جۆری "چووپ" کە زیاتر لە 20 سەرنشینی لەسەر بووە، كە كۆچبەربوون ویستوویانە لە توركیاوە بەدەریای ئیجەدا بۆ یۆنان بپەڕنەوە.