پڕۆژەی ڕووناکی نرخی ڕاستەقینەی کارەبای 24 کاتژمێری ئاشکرا کرد

هەواڵ
5 کاتژمێر لەمەوپێش

شەیری بکە لە:

پڕۆژەی ڕووناکی نرخی ڕاستەقینەی کارەبای 24 کاتژمێری ئاشکرا کرد

کارەبای 24 کاتژمێری. گرافیک؛ ئاڤا میدیا

ئاڤا نیوز

دوای پەسەندکردنی لە ئەنجوومەنی وەزیرانی هەرێمی کوردستان، تیمی پڕۆژەی ڕووناکی بۆ کارەبای 24 کاتژمێری نرخی کارەبای ئاشکرا کرد.

ڕاگەیێنراوی فەرمی: نرخی کارەبای ماڵان بە پێنج ئاست دیاریکراوە، لە 72 دینارەوە دەستپێدەکات بۆ 350 دینار و بەپێی بەکارهێنان نرخەکەی زیاتر بەرز دەبێتەوە، بۆ هاوبەشانی تریش وەکو پیشەسازی و بارزگانی و کشتووکاڵی نرخەکە جێگیرە.

زانیاریی زیاتر: بۆ سێ مانگی یەکەم حکومەت بە ڕێژەی جیاواز پاڵپشتی دارایی بۆ هاوبەشان دەکات، مانگی یەکەم 50%، مانگی دووەم 25% و مانگی سێیەم 15%.

ئەوەی پێویستە بیزانیت: نرخەکان بەشێوەیەک دانراون تاوەکو کارەبا کەمتر بەکاربهێنیت کەمتر پارەت بۆ دێتەوە، ئەمەش لەپێناو بەفیڕۆنەدانی کارەبا و کەمکردنەوەی بەکارهێنانیەتی.

نرخی کارەبای 24 کاتژمێری بۆ ماڵان بەمشێوەیە:

یەکەم: یەک بۆ 400 کیلۆوات: 72 دینار.

دووەم: 400 بۆ 800 کیلۆوات: 108 دینار.

سێیەم: 800 بۆ 1200 کیلۆوات: 175 دینار.

چوارەم: 1200 بۆ 1600 کیلۆوات: 265 دینار.

پێنجەم: هەزار و 600 کیلۆوات بۆ سەرەوە: 350 دینار.

پارەی مانگانە بەپێی کیلۆوات:

یەکەم: مانگانە 400 کیلۆوات بەکاربهێنیت: 28 هەزار و 800 دینارت بۆ دێتەوە.

دووەم: مانگانە 800 کیلۆوات بەکاربهێنیت: 72 هەزار دیارت بۆ دێتەوە.

سێیەم: هەزار و 200 کیلۆوات بەکاربهێنیت: 142 هەزار دینارت بۆ دێتەوە.

چوارەم: هەزار و 600 کیلۆوات بەکاربهێنیت: 248 هەزار دینارت بۆ دێتەوە.

پێنجەم؛ مانگانە دوو هەزار کیلۆوات بەکاربهێنیت: 388 هەزار دینارت بۆ دێتەوە.

ڕوونکردنەوەی پێویست: بەپێی ئەو داتایانەی لە مانگەکانی ڕابردوودا بە نموونە وەرگیراون و لەلایەن تیمی پڕۆژەی ڕووناکییەوە بە ئاڤا دراون، زۆربەی ماڵان مانگانە 760 کیلۆوات بەکار دەهێنن، بەمپێیەش مانگانە 67 هەزار و 680 دیناریان بۆ دێتەوە.

ژمارەکان وادەڵێن: نرخەکان بەپێی ئاستەکان دیاری دەکرێن، بۆنموونە ماڵێک کە 760 کیلۆوات بەکار دەهێنێت، 400 کیلۆواتی یەکەمی بە 72 دینار لەسەر هەژمار دەکرێت کە دەکاتە 28 هەزار و 800 دینار، 360 کیلۆواتەکەی تری بە 108 دینار لەسەر هەژمار دەکرێت کە دەکاتە 38 هەزار و 880 دینار، هەردووکیشی پێکەوە کۆدەکرێنەوە و دەکاتە 67 هەزار و 680 دینار.

هاوبەشانی تر: بازرگانی، میری (فەرمانگەکانی حکومەت) پیشەسازیی گەورە، پیشەسازی بچووک و کشتوکاڵی، نرخەکانی ئەوان جێگیرە و بەپێی کیلۆوات ناگۆڕێت، بەمشێوەیەن:

یەکەم: بازرگانی: هەر کیلۆ واتێک بە 185 دینار.

ئەگەر شوێنێکی بازرگانی بۆنموونە نانەواخانەیەک یان دووکانێک مانگانە هەزار کیلۆوات خەرج بکات، مانگانە 185 هەزار دیناری بۆ دێتەوە.

دووەم: پیشەسازیی گەورە: 125 دینار.

ئەگەر کارگەیەکی پیشەسازیی گەورە، بۆنموونە کارگەیەکی شیش مانگانە 100 هەزار کیلۆوات بەکاربهێنێت، ئەوا دەبێت مانگانە 12 ملیۆن و 500 هەزار دینار بدات.

سێیەم: کشتوکاڵی: 60 دینار.

ئەگەر کێڵگەیەکی کشتووکاڵی مانگانە 25 هەزار کیلۆوات کارەبا بەکاربهێنێت، دەبێت، مانگانە 600 هەزار دینار کارەبا بدات.

چوارەم: میری: 160 دینار.

ئەگەر فەرمانگەیەکی حکومەت مانگانە 2 هەزار کیلۆوات بەکاربهێنێت، ئەوا دەبێت مانگانە 320 هەزار دینار بدات.

پێنجەم: پیشەسازی: 160 دینار.

ئەگەر کارگەیەکی پیشەسازیی بچووک بۆنموونە کارگەیەکی جپس مانگانە 40 هەزار کیلۆوات بەکاربهێنێت ئەوا دەبێت مانگانە 6 ملیۆن و 400 هەزار دینار بدات.

خاڵی ئەرێنی: لەمەودوا لەسەر ئەو بنەمایە پارە لە هاوبەشان وەردەگیرێت، تەنانەت ئەو گەڕەک و ناوچانەی تاوەکو ئێستا لە هەولێر و سلێمانی و دهۆک کارەبایان بووەتە 24 کاتژمێری قەرەبوو دەکرێنەوە.

بۆ نموونە گەڕەکی ژیانی هەولێر کە 10 مانگە پڕۆژەی ڕووناکی پێگەیشتووە، کارەبای ڕابردووشیان بەپێی نرخە نوێیەکە بۆ هەژمار دەکرێ، لەم 10 مانگە چەند پارەی زیادەیان دابێت قەرەبوو دەکرێنەوە.