ترەمپ پلانێکی دیکە بۆ غەززە دەخاتەڕوو

ئاڤا نیوز

 

ئیدارەی دۆناڵد ترەمپ، سەرۆکی ئەمریکا هەوڵدەدات پلانێک ئامادە بکات، بۆ گواستنەوەی یەک ملیۆن فەڵەستینی لە کەرتی غەززە بۆ لیبیا بەشێوەیەکی هەمیشەیی.

 

زانیاریی بەدەستهاتوو: کەناڵی ئێن بی سی نیوزی ئەمریکی، لەپێنج سەرچاوەی ئاگادار لە بابەتەکە ئاشكرای دەکات، ئەمریکا پلانێک ئامادە دەکات بۆ گواستنەوەی یەک ملیۆن فەڵەستینی لە کەرتی غەززە بۆ لیبیا پلانەکە لە ژێر وردبینییەکی جددیدایە، ئەمریکا لەگەڵ سەرکردایەتیی لیبیا ئەم بابەتەی تاوتوێی کردووە، لە بەرامبەر نیشتەجێکردنی فەڵەستینییەکان، ئیدارەی ئەمریکا چەندین ملیار دۆلاری لیبیا ئازاد دەکات، کە زیاتر لە 10 ساڵ لەمەوبەر بلۆکی کردووە.

 

کاریگەری و لێکەوتەکان: ئەم پلانەی ئەمریکا لە کاتێکدایە، ئیسرائیل دەستیکردووە بە فراوانکردنی شەڕی غەززە، لەبارەی ئەمەوە ترەمپ ڕایگەیاند، لە ماوەی مانگی داهاتوودا زۆر شتی باش ڕوو دەدەن و دەبینین.

 

ئەمەش بزانە: تاوەکو ئێستا ڕێککەوتنی کۆتایی و پەسەندکردنی ئەم پلانە ئاشكرا نەکراوە.