پاپای نوێی ڤاتیکان دەستپێشخەرییەک لەبارەی جەنگی ئۆکراینا و ڕووسیا دەکات

ئاڤا نیوز

 

میدیاکانی ئەمریکا بڵاویانکردەوە، مانگی داهاتوو ڤاتیکان میوانداریی دانوستاندنەکانی ڕووسیا و ئۆکراینا بۆ گەیشتن بە ڕێککەوتنی ئاگربەست دەکات.

 

بڵاوکراوەی فەرمی: ڕۆژی پێنجشەممە، ڕێککەوتی 22-5-2025، ڕۆژنامەی وۆڵ ستریت جۆرناڵ بڵاویکردەوە، بڕیارە لە ناوەڕاستی مانگی داهاتوو لەسەر داوای پاپا لیۆی چواردەم، پاپای ڤاتیکان و ڕێبەری کاتۆلیکەکانی جیهان خولێکی نوێی دانوستاندنەکانی نێوان ڕووسیا و ئۆکراینا لە ڤاتیکان بەڕێوەبچێت.

 

ئەوەی پێویستە بیزانیت: ڕۆژنامەکە ئەوەشی ئاشکراکردووە، لە دانوستاندنەکاندا شاندێکی ئەمریکا بە بەشداریی مارکۆ ڕوبیۆ، وەزیری دەرەوەی ئەمریکا و چەند بەرپرسێکی دیکەی ئیدارەی ترەمپ ئامادە دەبن، بەڵام هیچ زانیارییەک لە بارەی شاندی ئۆکراینا و ڕووسیا نەخراوەتەڕوو.

 

قووڵتر: پاپا لیۆی چواردەم لە یەکەم وتاری دەستبەکاربوونیدا پشتیووانی  داوای ئاشتی و دادپەروەری و سەقامگیری  بۆ ئۆکراینا کرد، بۆ کۆتاییهێنان بەو جەنگەی کە سێ ساڵ زیاترە بەرۆکی ئۆکراینای گرتووە.

 

ئەمەش بزانە: ئەم داوایەی  پاپا  بۆ بەڕێوەچوونی دانوستاندنەکان لە ڤاتیکان هەوڵێکە بۆ دەستەبەرکردنی ئاشتی بۆ خەڵکی سڤیل لە ئۆکراینا، هاوکات دۆناڵد ترەمپ، سەرۆکی ئەمریکا پێشوازی لەو داوایە کرد.