هەوڵ دەدرێت ئەمساڵ سەرجەم گەنمی جووتیارانی هەرێمی کوردستان وەربگیرێت

ئاڤا نیوز

لیژنەکانی باڵا لەسەر ئاستی ئەنجوومەنی وەزیران خەریکی داڕشتنی پلانێکن بۆ ئەوەی سەرجەم گەنمی جووتیاران وەرگرن، دوو بژاردەیان بۆ ساغکردنەوەی بەرهەمی ئەمساڵی جووتیاران هەیە.

وێنە گەورەکە: ئەمساڵ بەگوێرەی پلانی وەزارەتی بازرگانیی عێراق، 400 هەزار تۆن گەنم لە جووتیارانی هەرێمی کوردستان وەردەگرێت، بەڵام کار لەسەر ئەوە دەکرێت گەنمی چوارچێوەی پلانی کشتوکاڵی و دەرەوەی پلانی کشتوکاڵی لە جووتیارانی هەرێمی کوردستانیش وەربگیرێت.

لێدوانی فەرمی: ڕزگار حەمەد، ئەندامی لیژنەی باڵای وەرگرتنی گەنم بە ئاڤای گوت، "چاوەڕێین وەڵامی شاندی بەغداین، بۆ ئەوەی سەردانیان بکەین بڕی گەنم زیاد بکرێت و پێداگری لەسەر وەرگرتنی سەرجەم گەنمی جووتیارانی هەرێمی کوردستان بکەین، ئەگەریش ڕازی نەبوون ئەو بڕەی دەمێنێتەوە لەڕێگەی کەرتی تایبەت ساغی دەکەینەوە."

زانیاریی زیاتر: بە گوتەی ئەو ئەندامەی لیژنەی باڵای وەرگرتنی گەنم، هەوڵدەدرێت لەسەرەتای مانگی داهاتوو دەرگای سایلۆکان بەڕووی گەنمی جووتیاران بکرێتەوە، ئەو 400 هەزار تۆنەی بۆ هەرێمی کوردستان دانراوە دابەشی سەر ڕووبەری داچێنراوی دیاریکراو دەکرێت لە هەر پارێزگارێک.