وردبینیکردن لە لیستی مووچەی مانگی پێنج تەواو دەبێت؛ پێش جەژن پارە دەنێردرێت؟

ئاڤا نیوز

چاوەڕوان دەکرێت سبەی چوارشەممە وردبینیکردن لە لیستی مووچەی مانگی پێنج تەواو بێت، ئەگەر ڕێگری سیاسی نەبێت پێش جەژن پارە دەنێردرێت و مووچە دابەش دەکرێت.

چیرۆکی سەرەکی: هەرچەندە ئەمڕۆ پشووی فەرمی بوو لە بەغدا، بەڵام بەپێی زانیارییەکانی ئاڤا وردبینیکردن لە لیستی مووچە بەردەوام بووە، تاوەکو ئێستاش هیچ گرفتێکی تەکنیکی بۆ مووچەی مانگی پێنج دروست نەبووە.

زانیاریی تایبەت: چاوەڕوان دەکرێت سبەی چوارشەممە وردبینیکردن لە لیستی مووچە تەواو بێت، دوای ئەوە ڕاستەوخۆ دەست بە ڕێکارەکانی خەرجکردنی پارە دەکرێت و هاوشێوەی مانگەکانی ڕابردوو چەند ڕۆژێکی پێویستە.

ئەوەی پێویستە بیزانیت: وەزارەتی دارایی و ئابووریی هەرێمی کوردستان بۆ مووچەی مانگی پێنج داوای 975 ملیار دیناری کردووە، ئەمە لەکاتێکدایە بۆ مووچەی مانگی چوار بەغدا 959 ملیار دیناری بۆ هەرێمی کوردستان نارد.

خاڵی ئەرێنی: ئەگەر هیچ گرفتێکی سیاسی دروست نەکرێت، پێش جەژن پارە لە بەغداوە دەنێردرێت و لە هەرێمی کوردستانیش لیستی مووچە ڕادەگەیێنرێت و دەست بە دابەشکردنی دەکرێت.