عێراقچی: بۆ پیتاندنی یۆرانیۆم داوای مۆڵەت لە هیچ لایەنێک  ناکەین

ئاڤا نیوز

وەزیری دەرەوەی ئێران دووپاتیکردەوە، بەردەوام دەبن لە پیتاندنی یۆرانیۆم لە ناو خاکی وڵاتەکەیان، هەر مەرجێکی دیکە بۆ پیتاندن لە دەرەوەی خاکی ئێران ڕەتدەکەنەوە.

وێنە گەورەکە:  ئەمریکا پێشنیازێکی نوێی سەبارەت بە ڕێککەوتنی ئەتۆمی پێشکەش بە ئێران کردووە، بۆ ڕێگەدان بە پیتاندنی یۆرانیۆم بە ڕێژەیەکی دیاری کراو، بەڵام لە دەرەوەی خاکی وڵاتەکە، تارانیش  ئەم مەرجە ڕەتدەکاتەوە و دەڵێت، "مۆڵەت لە هیچ و کەس و لایەنێک وەرناگرین بۆ درێژەدان بە پیتاندنی یۆرانیۆم لە دەرەوەی خاکی ئێران".

لێدوانی فەرمی: عەباس عێراقچی، وەزیری دەرەوەی ئێران ڕایگەیاند: بەردەوامی پیتاندنی یۆرانیۆم لە چوارچێوەی خاکی ئێران هێڵی سوورە، پیتاندن بۆ وڵاتەکەمان دەستکەوتێکی زانستییە کە زانایانی ئێمە بە هەوڵ و زانیاری خۆیان بەدەستیان هێناوە، نەک بەرهەمێکی هاوردەکراو کە بە ئاسانی دەستبەرداری بن.

- گەلی ئێران بۆ گەیشتن بەم شانازییە نیشتمانییە قوربانییەکی گەورەی دا و زیاتر لە 20 ساڵە بەهۆی ئەم دەستکەوتە بەرگەی گەمارۆیە توندەکانی ئەمریکایان گرتووە، تەنیا بۆ مەبەستی وزە و ئاشتی بەکاریدەهێنین و دەتوانین هەموو لایەک دڵنیا بکەینەوە ئەم پیتاندنە بۆ بەرهەمهێنانی چەکی ئەتۆمی نییە.