ئێران: هیچ ڕێککەوتنێکی تاکلایەنە و سەپێنراو قبوڵ ناکەین

ئاڤا نیوز

سەرۆکی پەرلەمانی ئێران لەبارەی پێشهاتەکانی وڵاتەکەی لەگەڵ واشنتن دەڵێت، ئێران هیچ ڕێککەوتنێکی تاکلایەنە و سەپێنراو قبوڵ ناکات.هاوکات، ئەگەر ئەمریکا بیەوێت بگاتە ڕێککەوتن پێویستە واز لە بیرۆکەکانی نەتانیاهۆ بهێنێت.

چیرۆکی سەرەکی: ئەمریکا و ئێران تاوەکو ئێستا پێنج خولی دانووستانی ناڕاستەخۆیان بە نێوەندگیری عومان ئەنجامداوە، سەرەڕای ئەوەی هەردوو لایەن کۆبوونەوەکان بە ئەرێنی وەسف دەکەن، بەڵام سەپاندی سزای نوێ لەلایەن ئەمریکا و هەڕەشەکانی ئیسرائیل بۆ سەر ئێران نیگەرانی بۆ لایەنی ئێرانی دروست کردووە.

لێدوانی فەرمی: محەممەد باقر قالیباف، سەرۆکی پەرلەمانی ئێران ڕایگەیاند، ئەمریکا دەبێ درک بەوە بکات، ئەگەر بە ڕاستی بەدوای ڕێککەوتندا دەگەڕێت، دەبێت ڕێبازی خۆی بگۆڕێت و خۆی لە بیرۆکەکانی نەتانیاهۆ بەدوور بگرێت.

- هاوکات لەبارەی سزاکانی ئەمریکاوە دەڵێت، لە پێشنیازی ئەم دواییەی ئەمریکادا باس لە هەڵگرتنی گەمارۆکان نەکراوە، ئەمەش هەڵسوکەوتی دژ بەیەک و ناپاکی واشنتن نیشان دەدات.

لەلایەکی دیکەوە: ئیسرائیل هەڕەشەی هێرشکردنە سەر ئێرانی کردووە، لە کاتێکدا ئەمریکا بەردەوامە لە دانووستانەکان لەگەڵ ئێران.