لە بەردەڕەش لە شەڕی نێوان دوو بنەماڵەدا دوو کەس بە گوللەی وێڵ دەکوژرێن

ئاڤا نیوز

بەهۆی دەستڕێژی گوللەوە، چوار ئەندامی خێزانێک لەسنووری قەزای بەردەڕەش بە فیشەک دەکەون، بەوهۆیەوە دوانیان گیانلەدەستدەدەن.

چیرۆکی سەرەکی: شەوی ڕابردوو، شەڕ لەنێوان دوو بنەماڵە لە شارۆچکەی بشیریانی سەر بە قەزای بەردەڕەش ڕوویدا، بەوهۆیەوە خێزانێک کە بە ڕێبواری بەشوێنی شەڕەکەدا تێپەڕیوون بەر دەستڕێژی گوللە کەوتوون و دوو کەسیان لێ کوژراوە.

لێدوانی فەرمی: سەرچاوەیەکی ئەمنی لە بەڕێوەبەرایەتی پۆلیسی بەردەڕەش بە ئاڤا میدیای ڕاگەیاند: کاتژمێر 12ـی شەوی چوارشەممە، شەڕ لەنێوان دوو بنەماڵە لە شارۆچکەی بشیریانی سەر بە قەزای بەردەڕەش لەسەر کێشەیەکی کۆمەڵایەتی ڕوویداوە، بەوهۆیەوە شەڕەتەقە دروست بووە.

سەرچاوە ئەمنییەکە دەڵێت، ئۆتۆمبێلێک کە خێزانێکی تێدابووە و پێکهاتوون لە باوکێک و سێ کچەکەی، بەشوێنی ڕووداوەکەدا تێپەڕیوون، بەڵام بەر دەستڕێژی گوللە کەوتوون، بەوهۆیەوە دوو خوشک بەناوەکانی 'ئامینە و ئانە' کوژراون، هەروەها شێرزاد کەریم و کچێکی دیکەی بە ناوی ئایە برینداربوون.

زانیاریی زیاتر: بریندارەکان برینەکانیان سەختە و بۆ وەرگرتنی چارەسەری پێویست گوازراونەتەوە بۆ نەخۆشخانەکانی هەولێر.