هەڕەشەی نوێ لە ئێرانەوە بۆ ئیسرائیل: سزای تووندی تۆڵە دەستپێدەکات

ئاڤا نیوز

ئێران هەڕەشەی نوێ و تووند لە ئیسرائیل دەکات، سوپاسالاری ئەو وڵاتە هۆشداری بە دانیشتووانی شارەکانی تەلئەبیب و حەیفای ئیسرائیل دەدات بەخێرایی شارەکان چۆڵ بکەن و دەڵێت بەمزووانە هێرشی تووندی تۆڵە دەستپێدەکات.

وێنە گەورەکە: جەنگی ئیسرائیل و ئێران کە پێنج ڕۆژە هەڵگیرساوە لە فراوانبوونە، بەشداریکردنی ئەمریکا لە جەنگە لە ئانوساتدایە، ئەمریکا دەستی بە جووڵە کردووە و هەموو کەشتییە جەنگییەکانی لە دەوروبەری ڕۆژهەڵاتی ناوەڕاست کۆکردووەتەوە بۆ ئەوەی لە هەر ساتێکدا بێت دەستوەردان بکات، دەستیشی کردووە بە گواستنەوەی فڕۆکە جەنگییەکان بۆ ڕۆژهەڵاتی ناوەڕاست.

لێدوانی فەرمی: سەرۆکی ئەرکانی سوپای ئێران داوای دەستبەجێ چۆڵکردنی شارەکانی تەلئەبیب و حەیفا لە خەڵکی دوو شارەکە دەکات. دەشڵێت، ئەو هێرشانەی کردوومانن تاوەکو ئێستا هێرشی بەرپەرچدانەوە بوون و بەمنزیکانە سزای تووندی تۆڵە دەستپێدەکات.

نزیکەی کاتژمێر 08:00ی ئەمشەو میدیا فەرمییەکانی ئێران لەسەر زاری بەرپرسانی سوپای پاسدارن بڵاوی کردەوە، کاروانێکی نوێی مووشەک و درۆنی ئاراستەی شارەکانی ئیسرائیل کرد بەڵام تاوەکو ئێستا هیچیان لە ئیسرائیل نەکەوتوونەتە خوارەوە. 

نزیکەی کاتژمێر 05:30ی خولەی ئێوارەی ئەمڕۆش سوپای پاسداران ڕایگەیاند ١٥ مووشەکی دیکەیان ئاراستەی ئیسرائیل کردوو.

 بە گوێرەی ئاژانسی هەواڵیی تەسنیم، لەم هێرشانەدا ژمارەیەکی زۆر مووشەکی بالیستی و درۆنی ئێرانی بەرەو "ئامانجی گرنگ و ستراتیژی" لە ناو خاکی ئیسرائیل ئاراستە کراون.

لەلایەکی دیکەوە: بۆردوومانی فڕۆکە جەنگییەکانی ئیسرائیل بۆ سەر شارەکانی ئێران بەردەوامە بەتایبەت لە شارەکانی تاران و ئەسفەهان، کاتژمێر 08:30 خولەکی ئەمشەو ئیسرائیل بۆردوومانێکی گەورەی کردە سەر تاران، میدیاکانی ئێرانیش بڵاویان کردەوە سیستەمی بەرگرییان لە چەند ناوچەیەک چالاک کردووە و بەرپەرچی ژمارەیەک مووشەکی ئیسرائیلیان داوەتەوە.