تەقینەوەیەک لە کەنیسەیەکی دیمەشق ڕووی دا؛ کوژراو و بریندار هەن

ئاڤا نیوز

ئێوارەی ئەمڕۆ یەکشەممە، تەقینەوەیەکی خۆکوژی لە کەنیسەی مار ئیلیاس لە دیمەشق ڕووی دا.

زانیاریی بەدەستهاتوو: ئاژانسی هەواڵی سانای  سووریا لە سەرچاوەیەکی ئەمنییەوە بڵاویکردەوە، لە کەنیسەی مار ئیلیاس لە ناوچەی دۆیلەعە لە دیمەشق تەقینەوەیەکی خۆکوژی ڕووی دا.

ڕاگەیێنراوی فەرمی: وەزارەتی ناوخۆی سوریا لەڕاگەیێنراوێکدا ڕایگەیاند: خۆکوژێکی سەر بە ڕێکخراوی تیرۆریستیی داعش چووەتە ناو کەنیسەی قەدیس مار ئیلیاس لە گەڕەکی دوێلعە لە دیمەشقی پایتەخت،  لەوێ دەستڕێژی گوللەی کردووە، پاشان خۆی بە پشتێنێکی بۆمبڕێژکراو تەقاندووەتەوە.

یەکە ئەمنییەکان بەپەلە گەیشتوونەتە شوێنی ڕووداوەکە و ناوچەکەیان بە تەواوی گەمارۆ داوە،  تیمە پسپۆرەکان دەستیان کردووە بە کۆکردنەوەی بەڵگەکان و بەدواداچوونی وردەکارییەکانی هێرشەکە.

بڵاوکراوەی فەرمی: دکتۆر حەمزە مستەفا، وەزیری ڕاگەیاندنی سووریا لە پەیامێکدا لە تۆڕی ئێکس ڕایگەیاند: بە تووندی ئەو تەقینەوە تیرۆریستییە ئیدانە دەکەین، پرسە و سەرەخۆشیی خۆمان ئاڕاستەی کەسوکاری قوربانییەکان دەکەین. ئەم کارە ترسنۆکانەیە لەگەڵ بەهاکانی هاوڵاتیبووندا نایەتەوە کە هەموومان کۆدەکاتەوە. ئێمە، وەک سورییەکان، جەخت لەسەر گرنگیی یەکێتیی نیشتمانیی و ئاشتیی کۆمەڵایەتی دەکەینەوە، و داوا دەکەین پەیوەندییەکانی برایەتی لەنێوان هەموو پێکهاتەکانی کۆمەڵگادا بەهێزتر بکرێت.

ئێمە لە پابەندبوونمان بە هاوڵاتیبوونی یەکسان پاشگەز نابینەوە، کە هەوڵدەدات بۆ بوونیادنانی نیشتمانێک کە ئارامی و سەقامگیری باڵی بەسەردا بکێشێت. هەروەها جەخت لەسەر بەڵێنی دەوڵەت دەکەینەوە بۆ بەکارهێنانی هەموو هەوڵێک بۆ شەڕکردن دژی ڕێکخراوە تاوانکارییەکان و مسۆگەرکردنی پاراستنی کۆمەڵگە لە هەر دەستدرێژییەک کە هەڕەشە لە سەلامەتییەکەی بکات.

لەلایەکی دیکەوە: وەزارەتی تەندروستی سووریا ڕایگەیاند، بەپێی ئامارە سەرەتاییەکان، 20 کەس گیانیان لەدەستداوە و 52 کەسیش بریندارن.