کێشەی جووتیارانی کورد لە خورماتوو سەرهەڵدەداتەوە و چوار کەس دەستگیر دەکرێن

ئاڤا نیوز

بڕیارێکی دادگای خورماتوو لەسەر ئەو زەوییە کشتوکاڵیانەی کێشەیان لەسەرە جووتیارانی کوردی تووڕە کردووە، بەم هۆیەوە شەڕ و ئاڵۆزی دروست بووە و دۆخەکە لە گوندێکی قەزاکە ناسەقامگیرە.

چیرۆکی سەرەکی: لە سنووری قەزای خورماتوو سێ ڕۆژه کێشەی زەویی جووتیارانی کورد سەریهەڵداوەتەوە، کێشە و ئاڵۆزی لەنێوان جووتیارانی کورد و عەرەبە هاوردەکان دروست بووە، لەلایەن پۆلیسەوە فەرمانی دەستیگیرکردن بۆ 26 جووتیاری کورد دەرکراوە و چوار کەسیش لەلایەن هێزە ئەمنییەکانەوە دەستگیر کراون.

ئەوەی پێویستە بیزانیت: بەم دواییانە دادگای خورماتوو دۆسیەی دوو هەزار دۆنم زەوی لە بەرژەوەندیی عەرەبە هاورەکان یەکلایی کردووەتەوە. ئەم بڕیارەش پێچەوانەی یاسای نوێی پەرلەمانی عێراقە لەبارەی خاوەندارییەتی ئەو زەویانەی کێشەیان لەسەرە و لە سەردەمی ڕژێمی بەعش بە عەرەبی هاوردە دراون.

چی ڕووی دا: ڕۆژی یەكشەممە 22-6-2025، هێزێكی ئەمنیی عێراق بە پشتبەستن بە چەند بەڵگەنامە و بڕیارێكی دادگا و  بە پاڵپشتیی ژمارەیەك بەرپرسی ناوچەكە، ویستیان زەویی جووتیارانی كوردی گوندی تەپەسەوز ڕادەستی عەرەبی هاوردە بكەن، بەڵام لەلایەن جووتیارانی كوردەوە ڕێگرییان لێ كرا و شەڕ دروست بوو.

زانیاریی زیاتر: دوای شەڕەکە عەرەبە هاوردەکان سکاڵایان لای پۆلی تۆمار کردووە، پۆلیس فەرمانی دەستگیرکردنی بۆ 26 جووتیار دەکردووە.

بەیانی ئەمڕۆ پۆلیس و هێزە ئەمنییەکان لە شەش بنکەوە بەسەر گوندەکەیان داداوە. چەند کەسێک لە گوندی تەپەسەز قسەیان بۆ ئاڤا کردووە، دەڵێن، پۆلیس و  هێزە ئەمنییەکانی عێراق "بە شێوازێکی زۆر ناشرین" مامەڵەیان لەگەڵ خەلک کرد،  چوار کەسیان دەستگیر کرد و بە ساتوورە کەوتنە گیانیان دواتر ڕاپێچی بنکەی پۆلیسیان کردن.

خەڵکی گوندەکەش دەشڵێن: پۆلیس و هێزە ئەمنییەکان بەبێ ئاگادارکردنەوە و لە دەرگەدان بەناو ماڵان کەوتوون، تەنانەت ئۆپەراسیۆنیان کردووە هاوشێوەی ئەوەی "بیانەوێت سەرکردەیەکی داعش دەستگیر بکەن"، تەنانەت ژن و منداڵی تەمەن خوار 18 ساڵیان ئازار داون.