ئەو هاووڵاتیانەی نۆرەی مامەڵەی كارتی نیشتمانییان گرتووە ئاگادار دەکرێنەوە

ئاڤا نیوز

بەڕێوەبەرایەتیی ڕەگەزنامە و باری شارستانیی هەولێر داوا لە هاووڵاتیان دەكات، سبەی ناتوانن هیچ مامەڵەیەك ئەنجام بدەن و ئەوانەشی مامەڵەی فەرمانگەكانی كارتی نیشتمانییان هەیە، مامەڵەكانیان دەكەوێتە ڕۆژی یەكشەممەی هەفتەی داهاتوو.

وێنە گەورەكە: سبەی پێنجشەممە 26ـی حوزەیران، بەبۆنەی یەكی موحەڕەم کە سەری ساڵی كۆچییە، لە سەرجەم دامودەزگا حكومییەكانی هەرێمی كوردستان و عێراق، پشووی فەرمییە، بۆیە سیستمی ئەلیكترۆنی داخیلكردنی زانیاریی هاووڵاتییان بۆ دەرهێنان و نوێكردنەوەی كارتی نیشتمانی دادەخرێت و بەردەست نابێت.

ڕاگەیێنراوی فەرمی: كەمێك لەمەوبەر، بەڕێوەبەرایەتیی ڕەگەزنامە و باری شارستانیی هەولێر ئاگادارینامەیەكی بڵاوکردەوە، تێیدا ئاماژەی بەوە كردووە هەر هاووڵاتییەک بۆ بەیانی 26ـی حوزەیران نۆرەی ئەلیکترۆنی گرتووە، پێویستە تا ڕۆژی یەکشەممە 29ـی حوزەیران چاوەڕێ بکات.

هۆكارە زانراوەكان: بەڕێوەبەرایەتییەكە ڕوونیشی كردووەتەوە، گۆڕانکاری و گواستنەوەی مامەڵەکان بۆ ڕۆژی یەکشەممە دەگەڕێتەوە بۆ ئەو هۆکارەی کە بەیانی پێنجشەممە لە تێكڕای فەرمانگە حكومییەكان پشووە و دەوام ناکرێت، ئەمەش وا دەكات سیستمی ئەلیكترۆنی بۆ دەرهێنان و نوێكردنەوەی كارتی نیشتمانی بەردەست نەبێت.