ترەمپ بۆ دادگای ئیسرائیل: واز لە نەتانیاهۆ بهێنن، ئەو پاڵەوانی جەنگە

ئاڤا نیوز

 

سەرۆکی ئەمریکا جارێکی دیکە پشتگیریی خۆی بۆ هەڵوەشاندنەوەی دادگاییکردنی سەرۆکوەزیرانی ئیسرائیل دووپات دەكاتەوە و بە "سەربازێکی بەهێز" ناوی دەبات.

 

وێنە گەورەکە: نەتانیاهۆ لە ساڵی 2019 بە تۆمەتی بەرتیل و ساختەکاری و شکاندنی متمانە تۆمەتبار کرا، لە بەرامبەردا نەتانیاهۆ ئەم تۆمەتانەی ڕەتکردەوە و تا ئێستا چەندین دانیشتنی دادگا بۆ ئەم مەبەستە ئەنجام دراون. دۆناڵد ترەمپی سەرۆکی ویلایەتە یەكگرتووەكانی ئەمریكاش لە دوو ڕۆژدا، دووجار داوای هەڵوەشاندنەوەی دادگاییکردنەکەی  نەتانیاهۆی کردووە.

 

لێدوانی فەرمی: دۆناڵد ترەمپ ڕایگەیاند: نەتانیاهۆ پاڵەوانی جەنگە، ئەو  سەرۆکوەزیرانێکە کە لەگەڵ ئەمریکا کاری کرد و سەرکەوتنی گەورەی بەدەستهێنا لە لابردنی هەڕەشەی چەکی ئەتۆمیی ئێران.

ترەمپ لەو پۆستەیدا کە لە تۆڕی كۆمەڵایەتیی ترووس کردوویەتی، دەڵێت، "ئەو ئێستا سەرقاڵی گفتوگۆیە لەگەڵ حەماس بۆ گێرانەوەی بارمتەکان، چۆن دەبێت تەواوی ڕۆژەکەی لە دادگا بەسەر ببات کە هیچیشی نەکردووە. ئەوەی بەرامبەر نەتانیاهۆ  دەکرێت بێبەڵگەییە، وەک چۆن بەرامبەر منیش کرا".