ڕووسیا ناڕازییە لە پڕۆژەیەكی ئەمریكا تایبەت بە غەززە

ئاڤا نیوز

ڕووسیا ناڕازییە لەو پڕۆژەیەی ئەمریکا لە ئەنجوومەنی ئاسایشی نێودەوڵەتی سەبارەت بە ئاگربەست لە غەززە پێشکەشی کردووە، پڕۆژەکەش بە یاریکردن بە کۆمەڵگەی نێودەوڵەتی ناودەبات.

لێدوانی فەرمی: دیمیتری بۆلیانسکی، جێگری باڵیۆزی ڕووسیا لە نەتەوەیەکگرتووەکان رایگەیاند: مۆسکۆ ڕازی نییە بە هیچ شتێک کە داوای بەپەلە ڕاگرتنی شەڕ نەکات، بۆ ئەوەش فشار لە ئەنتۆنی بلینکن وەزیری دەرەوەی ئەمریکا دەکەن، چونکە پڕۆژەکە یاریکردنە بە کۆمەڵگەی نێودەوڵەتی.

ئەوەی پێویستە بیزانیت: بڕیارە ئەمڕۆ ئەنجوومەنی ئاسایشی نێودەوڵەتی دەنگ لەسەر پڕۆژە بڕیارێک بدات کە ئەمریکا پشتیوانی دەکات و ناوەڕۆکەکەی باس لەوە دەکات پێویستە بەزوویی ئاگربەستی بەردەوام لە غەززە ڕابگەیێنرێت و شەڕ لەنێوان ئیسرائیل و حەماس ڕابگیرێت، ئەویش لەپێناو پاراستنی سڤیلەکان و ڕێگەدان بە گەیشتنی هاوکاری مرۆیی بۆ غەززە، هاوکات ئازادکردنی بارمتە ئیسرائیلیەکانی نەکردووەتە مەرج وەک لەپڕۆژەکەی پێشووی ئەمریکا بۆ ئاگربەست هاتبوو، بەڵام پڕۆژەکەی ئەمریکا باس لە ڕاگرتنی هاوکاری دارایی و سەربازی بۆ حەماس دەکات.

لە لایەکی دیکەوە: لیندا تۆماس، باڵیۆزی ئەمریکا لە نەتەوەیەکگرتووەکان ڕایگەیاند: گەشبینم بە پڕۆژە بڕیارێکی نوێ کە 15 ئەندامی ئەنجوومەنی ئاسایش دەنگی پێبدەن.

باکگراوند: لەحەوتی ئۆکتۆبەری ساڵی ڕابردووەوە شەڕ لە غەززە لەنێوان ئیسرائیل و حەماس بەردەوامە، نزیکەی 32 هەزار فەڵەستینی کوژراون، تائێستاش هەزار و 200 ئیسرائیلی کوژراون.