پەیوەندییەکی نهێنی بەرپرسانی ئێران دوای هێرشەکەی ئەمریکا ئاشکرا دەکرێت

ئاڤا نیوز

ڕۆژنامەیەکی ئەمریکی بە پشبەستن بە چەند زانیارییەکی هەواڵگری ئەمریکا گفتوگۆی چەند بەرپرسێکی ئێرانی دوای هێرشەکەی ئەمریکا بۆ سەر بنکە ئەتۆمییەکانیان ئاشکرا دەکات.

وێنە گەورەکە: هێرشەکەی ئەمریکا بۆ سەر بنکە ئەتۆمییەکانی ئێران هێشتا جێگەی مشومڕ و گومانی بەشێک لە ئەمریکییەکانە و پێیان وایە زیانەکانی ئەو هێرشە بەو ئەندازەیە نین کە بەرپرسانی واشنتن باسی لێوەدەکەن.

زانیاری بەدەستهاتوو: ڕۆژنامەی واشنتن پۆستی ئەمریکی لە زاری چوار کەسی ئاگادار لە زانیارییە هەواڵگرییەکانی ئەمریکا بڵاویکردەوە، '' پەیوەندیی چەند بەرپرسێکی ئێرانی کە لەلایەن ئەمریکاوە ڕیکۆرد کراوە، باسیان لەوە کردووە کە هێرشەکەی ئەمریکا لە ئاست چاوەڕوانی ئەوان نەبووە و هێرشەکە ئەوەندە وێرانکەر و زیانبەخش نییە کە پێشبینیان کردووە".

لەلایەکی دیکەوە: کارۆلین لیڤیت، وتەبێژی کۆشکی سپی لە بارەی ئەو راپۆرتەی واشنتن پۆست هاتە دەنگ و ڕایگەیاند: ''ئەو هەواڵە زۆر بێ مانەیە  و دوورە لە ڕاستییەوە،  بەرپرسانی ئێرانی چۆن بزانن لە قوڵایی چەند سەد پێ لە ژێر زەوی زیانەکان چین، جارێکی دیکە دووپاتی دەکەینەوە بەرنامەی ئەتۆمی ئێران کۆتایی هاتووە''.