تووتنی تێكه‌ڵ به‌ مادده‌ى هۆشبه‌ر له‌ هیندستانەوە دەهێنرێتە عێراق و کوردستان

ئاڤا نیوز

تووتنی تێكه‌ڵ به‌ مادده‌ى هۆشبه‌ر له‌ عێراقه‌وه‌ هێنراوه‌ته‌ هه‌رێمی كوردستان  و مرۆڤ ئالووده‌ دەکات.

چیرۆکی سەرەکی: تووتنەکە هیندییە و دوو جۆرە، بۆ نێرگەلە بەکاردەهێنرێت و جگەرەشی لێ دروست دەکرێت. سەرەتا لەلایەن سێ بازرگانی هیندییەوە لە فڕۆكەخانەکان و دەروازە سنوورییەكان هاوردە کراوە، بازرگانێکی کوردیش هاوبەشیان بووە.

ئەوەی لەوبارەیەوە دەگوترێت: تووتنەکە ئاسایی دەرکەوتووە، بە بازگەکان و کواڵیتی کۆنترۆڵ و دەزگا ئەمنییەکان و هەموو شوێنێکدا تێپەڕیوە، دواتر دراوەتە فرۆشگاکان، لەوێشەوە بەسەر دووکان و کافتریا و یانە شەوانەکاندا بڵاوکراوەتەوە.

چۆن ئاشکرا کراوە؟

دوای ماوەیەک لە بەکارهێنان گومان دەکرێت ئەم تووتنە سرووشتی نییە، لە کوردستان بە ئامێری پێشەکەوتووتر پشکنینی بۆ کراوە، دەرکەوتووە بڕێک ماددەی هۆشبەر و كارتێكەری عەقڵی تێدایە كە لە ئامێر و سیستەمەكانی كوالێتی كۆنترۆڵ بەئاسانی دەرناچێت و هەستی پێ ناكرێت.

حکومەتی کوردستان حکومەتی عێراقی لێ ئاگادار کردووەتەوە، دەستبەجێ هەردوولا دەستیان بە دەستبەسەرداگرتن و کۆکردنەوەی تووتنەکە کردووە. ڕاستەوخۆش خراوەتە لیستی وەزارەتی تەندروستی بۆ ماددە هۆشبەرەکان و كارتێكەرە عەقڵییەكان و هاوردەکردنی بە هەموو شێوەیەک قەدەغە کراوە.

لەلایەکی دیکەوە: دەزگا ئەمنییەکانیش دەستیان بە گرتنەبەری ڕێكاری یاسایی کردووە بەرامبەر هەموو ئەو كەس و لایەنانەی تووتنەکەیان هێناوە. ئاسایشی هەولێر هەر چوار بازرگانەکەی دەستگیر کردووە، سێ بازرگانە هیندییەکە و بازرگانە کوردەکە ئەوەی هاوبەشیان بووە.

لێکۆڵینەوەی ورد کراوە لەگەڵ كارمەندانی بەڕێوەبەرایەتیی كوالێتی كۆنترۆڵی عێراق و هەرێمی كوردستان، ئایا  تێپەڕبوونی ئەو تووتنە لە پشکنین، بە ئەنقەست بووە یاخود نا.

كەیسەكە دەگاتە دادگا و بازرگانە هیندییەكان دەڵێن، "ئێمە ئەو تووتنەمان بەپێی قانوون و ڕێنماییەكان هێناوە، بەفەرمی لە فڕۆکەخانە و سنوورەکان داخیلمان كردووە، ئەوکات ئەو تووتنە لە لیستی ماددە هۆشبەرەکان نەبووە، بازرگانە كوردەكەش بەهەمان شێوە بەرگری لەخۆی كردووە.

ئەوەی پێویستە بیزانیت: ئەم بابەتە دوو ساڵ پێش ئێستا بووە، دوای دوو ساڵ لێکۆڵینەوە و بەدواداچوون، دواجار چەند ڕۆژێک پێش ئێستا دادگا بڕیاری داخستنی دۆسیەكەی داوە و بازرگانەكانیش ئەستۆپاکییان بۆ دەرچووە. بەهۆی داخستنی دۆسیەكەش، لێكۆڵینەوە لەگەڵ كارمەندانی كوالێتی كۆنترۆڵ و دڵنیایی جۆریش کۆتایی هاتووە.