عێراق سێ فڕۆکەخانەی گەورە دەکاتەوە

ئاڤا نیوز

بڕیارە تا کۆتایی ئەمساڵ، عێراق سێ فڕۆکەخانەی گەورە لە چەند پارێزگایەک بکاتەوە، هاوکات فڕۆکەخانەی بەغدای نێودەوڵەتیش بەتەواوی نۆژەندەکرێتەوە .

بۆچی گرنگە: گەشتکردنی هاووڵاتیانی عێراق لە ڕێگەی فڕۆکەخانەوە بە هەنگاوێکی وەرچەرخێنەر بەرەو بەستنەوەی پارێزگاکانی عێراق بە جیهانەوە دادەنرێت ، ئەمەش دەبێتە هەنگاوێک بۆ گەشەپێدانی ئابووری پارێزگاکان.

لێدوانی فەرمی: مەیسەم سافی، وتەبێژی وەزارەتی گواستنەوەی عێراق ڕایگەیاند: تا کۆتایی ئەمساڵ، فڕۆکەخانەکانی موسڵ و کەربەلا و ناسرییە بەفەرمی بەڕووی گەشتیاراندا دەکرێنەوە.

زانیاریی زیاتر: بە گوتەی سافی، تا کۆتایی ئەمساڵ پڕۆسەی نۆژەنکردنەوەی فڕۆکەخانەی نێودەوڵەتیی بەغدا لە ڕێگەی 26 پڕۆژەی  گەشەپێدانەوە  تەواو دەبێت .