وەزیری دەرەوەی بەریتانیا لەگەڵ ئەحمەد شەرع کۆ دەبێتەوە

ئاڤا نیوز

وەزیری دەرەوەی بەریتانیا، لە دیمەشقی پایتەخت لەگەڵ ئەحمەد شەڕع، سەرۆککۆماری سووریا کۆبووەوە بۆ تاوتوێکردنی پتەوکردنی هاوکارییەکانیان بۆ ئەو وڵاتە. ئەم سەردانە دوای ئەوە دێت کە بەریتانیا سزاکانی سەر سووریای هەڵگرت.

وێنە گەورەکە: سەرکردایەتی نوێیی سووریا هەوڵ دەدەن بۆ دووبارە بنیاتنانەوەی ئابووری و ژێرخانە وێرانبووەکەی وڵاتەکە دوای نزیکەی 14 ساڵ لە شەڕی ناوخۆ، کە بووە هۆی کوژرانی نیو ملیۆن کەس. لە چەند مانگی ڕابردوودا، شەڕع سەردانی وڵاتانی دەوڵەمەند بە نەوتی ناوچەکەی کردووە و لە مانگی ئایاریشدا لە یەکەم سەردانیدا بۆ یەکێتیی ئەوروپا، چوو بۆ فەرەنسا.

ڕاگەیێنراوی فەرمی: نووسینگەی ئەحمەد شەرع، سەرۆککۆماری سووریا بڵاویکردەوە، لە کۆبوونەوەی نێوان ئەحمەد شەرع، سەرۆککۆماری سووریا و دەیڤد لامی، وەزیری دەرەوەی بەریتانیا باس لە پەیوەندییە دووقۆڵییەکان، ڕێگاکانی پتەوکردنی هاوکاری و دوایین پێشهاتە ناوچەیی و نێودەوڵەتییەکان کراوە.

ئەوەی پێویستە بیزانیت: لە مانگی چواردا، حکومەتی بەریتانیا سزاکانی لەسەر دەیان دامەزراوەی سووریا، لەنێویاندا فەرمانگە حکومییەکان و دامەزراوە میدیاییەکان هەڵگرت، بۆ یارمەتیدانی وڵاتەکە لە دووبارە بوونیادنانەوەی. چەند هەفتەیەک پێشتریش، بەریتانیا سزاکانی لەسەر نزیکەی بیست و چوار کۆمپانیای سووری هەڵگرت کە زۆربەیان بانك و کۆمپانیای نەوتی بوون. هاوکات، حکومەتی بەریتانیا بڕیاریدا بە پاکێجێکی 129 ملیۆن دۆلاری هاوکاری مرۆیی بگەیەنێتە سووریا.

لەلایەکی دیکەوە: لەم هەفتەیەدا، دۆناڵد ترەمپ، سەرۆکی ئەمریکا، فەرمانێکی واژۆ کرد کە کۆتایی بە زۆرێک لە سزاکانی ئەمریکا بۆ سەر سووریا هێنا، ئەمەش وەک جێبەجێکردنی ئەو بەڵێنەی کە بە شەڕعی دابوو.

باکگراوند: دوای ڕووخانی ڕژێمی بەشار ئەسەد، حکومەتی نوێی سووریا هەوڵەکانی چڕکردووەتەوە بۆ ئاساییکردنەوەی پەیوەندییەکانیان لەگەڵ وڵاتانی ڕۆژئاوا.