هێرشەکانی ئیسرائیل بۆ سەر سووریا ئەنجوومەنی ئاسایشی نێودەوڵەتی کۆدەکاتەوە

ئاڤا نیوز

لەسەر داوای جەزائیر، بڕیارە سبەی پێنجشەممە، ئەنجوومەنی ئاسایشی نێودەوڵەتی، کۆبوونەوەیەکی بەپەلە سەبارەت بە بۆردوومانەکانی ئیسرائیل بۆ سەر سووریا بکات.

چیرۆکی سەرەکی: ڕۆژی چوارشەممە، ئیسرائیل چەندین هێرشی ئاسمانیی بۆ سەر دیمەشق و دەرعا و سوەیدا ئەنجامدا، هێرشەکان بارەگای ئەرکانی گشتیی هێزە چەکدارەکانی سووریا و کۆشکی سەرۆکایەتی کردە ئامانج.

ڕاگەیێنراوی فەرمی: عاسم ئیفتیخار ئەحمەد، نوێنەری هەمیشەیی پاکستان، کە وڵاتەکەی سەرۆکایەتیی خولی ئێستای ئەنجوومەنی ئاسایش دەکات، ڕایگەیاند کۆبوونەوەکەی ئەنجوومەنی ئاسایشی نێودەوڵەتی سەبارەت بە بۆردوومانەکانی ئیسرائیل بۆ سەر سووریا، ڕۆژی پێنجشەممە 2025-07-17، کاتژمێر 3ـی پاشنیوەڕۆ بە کاتی نیویۆرک دەکرێت.

لەلایەکی دیکەوە: بەپێی ئاژانسی ڕۆیتەرز، سووریا داوای لە ئەنجوومەنی ئاسایشی نێودەوڵەتی کردووە، بۆ تاوتوێکردنی هێرشەکانی ئیسرائیل بۆ سەر خاکی سووریا لە نزیکترین کاتدا کۆببێتەوە.