عێراق دەیەوێت "هەڵەیەک"ـی پێش چوار ساڵی خۆی ڕاستبکاتەوە

ئاڤا نیوز

پەرلەمان و دەستەی خانەنشینی عێراقی کەمکردنەوەی تەمەنی خانەنشینی بە بڕیارێکی بەپەلە دەزانن و دەڵێن، فشار لەسەر کورتهێنانی سندووقی خانەنشینی دروست دەکات.

چیرۆکی سەرەکی: لە دوایین کۆبوونەوەی لیژنەی دارایی پەرلەمانی عێراق لە 25-03-2024 بە ئامادەبوونی سەرۆکی دەستەی خانەنیشنی نیشتمانی، سەرۆکی لیژنەی دارایی ڕایگەیاند، هەمواری یەکەمی یاسای خانەنشینی لە ساڵی 2019 (تەمەنی خانەنشینی تێیدا کەمکرایەوە)، پەلەی تێدا کراوە و فشاری زۆری خستووەتە سەر سندووقی خانەنشینی و داهاتی سندووقەکەی کەمکردووەتەوە.

لێدوانی فەرمی: ڤیان سەبری، سەرۆکی فراکسیۆنی پارتی لە ئەنجوومەنی نوێنەرانی عێراق بە ئاڤا نیوزی ڕاگەیاند، ئێمە لەگەڵ هەموارکردنەوەی یاسای خانەنشینین بۆ بەرزکردنەوەی تەمەنی خانەنشینان بۆ 63 ساڵ و زیاتریش، بە تایبەت بۆ پلەدار، باڵیۆز و پسپۆرەکان.

 

لێکەوتەکانی: دەستەی خانەنیشنی نیشتمانیی عێراقی ڕووبەڕووی کورتهێنان بووەتەوە، ئەمەش بەهۆی زیادبوونی ژمارەی خانەنشینانی ساڵانە، کە لە 10%ـەوە بووەتە 12%، بۆ چارەسەری ئەمەش لە کۆبوونەوەکەدا ئاماژە بەوە دراوە، کە دەبێت دووبارە پێداچوونەوە بە بڕگەی کەمکردنەوەی تەمەنی خانەنشینیدا بکرێت و لە 60 ساڵیەوە بکرێتەوە بە 63 ساڵی.