دوای دەستگیرکردنی پەیامنێرێکی کەناڵی زووم تا ئێستا ئازاد نەکراوە

ئاڤا نیوز

شەوی ڕابردوو لەگەڵ دەستپێکردنی هێرش بۆسەر لالەزار، دامەزراوە میدیاییەکانی نزیک لە لاهوور شێخ جەنگی لەلایەن هێزە ئەمنییەکانەوە هێرشیان کرایەسەر.

چیرۆکی سەرەکی: شەوی ڕابردوو هێزێکی ئەمنی چوونەتە سەر ئۆفیسی سەرەکی کەناڵی زووم، کە دەکەوێتە نهۆمی دەیەمی باڵەخانەی (ئێن) لە پڕۆژەی نیشتەجێبوونی دەروازەی دوو بەدیاریکراوی پشتی باڵەخانەی پارێزگای سلێمانییەوە.

لێدوانی فەرمی: بەرپرسێکی کەناڵی زووم کە نزیکە لە لاهوور شێخ جەنگی بە ئاڤا میدیای وت: شەوی ڕابردوو تا درەنگانێک لەناو کەناڵەکە بووین، بەڵام بەرەبەیان لە پێناو سەلامەتی گیانی کارمەندەکانمان هەموومان شوێنەکەمان جێهێشت.

لەلایەکی دیکەوە: شەوی ڕابردوو پەیامنێرێکی کەناڵی زووم بە ناوی محەممەد دڵشاد لەلایەن هێزێکی ئەمنیەوە دەستگیرکراوە. بەگوێرەی وتەی ئەو بەرپرسەی کەناڵی زووم، بەڵێن درا بوو ئەمڕۆ ئازاد بکرێت، بەڵام  هێشتا پەیامنێرەکەیان ئازاد نەکراوە.

زانیاریی زیاتر: ئەو هێزە ئەمنییە ژمارەیەک ئامێر و کۆمپیوتەریان بردووە، ئەمڕۆ هەینی کەلوپەلەکانیان گەڕاندوەتەوە. بەڵام پەخشی کەناڵەکە تا کاتێکی نادیار وەستاوە.

ئەوەی پێویستە بیزانیت: دامەزراوەی زووم، لە پێناسی خۆیاندا دەڵێن، دەزگاکە لەلایەن کۆمپانیای (معادل زەهەبی) خاوەنداریەتی دەکرێت. لە بەیانی ئەمڕۆ بەشێک لە پلاتفۆڕمەکانی ئەو دامەزراوەیە ڕووبەڕووی هاک بوونەوە، بەڵام ئەو بەڕپرسەی کەناڵەکە کە قسەی بۆ ئاڤا کردووە دەڵێت: تەنیا چەند کاتژمێرێک هاککران دواتر بە زوویی گەڕێنرانەوە و هاکیان لەسەر هەڵگیراوە.