سەرۆکی هەرێمی کوردستان سەردانی بەغدا دەکات

ئاڤا نیوز

گوتەبێژی سەرۆکایەتیی هەرێمی کوردستان ڕایگەیاند، ڕۆژی شەممە نێچیرڤان بارزانی دەچێتە بەغدا و لەگەڵ سوودانی کۆدەبێتەوە.

لێدوانی فەرمی: دڵشاد شەهاب، گوتەبێژی سەرۆکایەتیی هەرێمی کوردستان بە ئاڤا نیوزی ڕاگەیاند: لە سەردانەکەیدا بۆ بەغدا نێچیرڤان بارزانی، سەرۆکی هەرێمی کوردستان لەگەڵ محەممەد شیاع سوودانی، سەرۆکوەزیرانی عێراق لەبارەی پەیوەندییەکانی نێوان هەولێر و بەغدا کۆدەبێتەوە.

زانیاریی زیاتر: پرسی بودجە، مووچە، نەوت و پەیوەندییەکانی نێوان هەولێر و بەغدا ئەو پرسانەن کە سەرۆکی هەرێمی کوردستان و سەرۆکوەزیرانی عێراق گفتوگۆی لەسەر دەکەن، هەروەها جێبەجێ کردنی خاڵەکانی لایەنەکانی چوارچێوەی هەماهەنگی کە حکومەتی ئێستای عێراق لەسەر بوونیادنراوە و جێبەجێکردنی پشتگوێ خراوە.

ئەوەی پێویستە بیزانیت: سەردانی سەرۆکی هەرێمی کوردستان دوای ڕێککەوتنی سەرۆکوەزیران بارزانی و سوودانی دێت، لەبارەی چارەسەرکردنی پرسی مووچە و لێکتێگەیشتن لەبارەی دووبارە دەستپێکردنەوەی هەناردەکردنی نەوتی هەرێمی کوردستان.