لەبارەی گەنم لیژنەیەکی عێراق سەردانی هەرێمی کوردستان دەکات

ئاڤا نیوز

 

بەمەبەستی خەمڵاندنی ڕووبەری داچێنراو بە گەنم و کوالێتی جۆرەکەی، لیژنەیەک لە بەغداوە سەردانی سەرجەم پارێزگاکانی هەرێمی کوردستان دەکات.

وێنە گەورەکە: حکومەتی عێراق بڕیاریداوە، ئەمساڵ سەرجەم بەرهەمی جووتیاران وەربگرێت و نرخی هەر تۆنێک 850 هەزار دینارە، هەوڵ بۆ ئەوەیە گرفت بۆ ساغبوونەوەی بەرهەمی جووتیاران دروست نەکرێت و ڕەنج بە خەسار نەبن.

بۆچی گرنگە: گەنم ڕووبەری داچێنراوی نزیکەی سێ ملیۆن دۆنم زەوی کشتوکاڵی هەرێمی کوردستان پێکدەهێنێت، بژێوی بەشێکی دانیشتووانی هەرێمی کوردستان لەسەر بەرهەمەکەیەتی.

لێدوانی فەرمی: "ئەو لیژنەیە دوای پێشکەشکردنی ڕاپۆرتی ئێمە دێت، کە سەبارەت بە گەنم و ناوی جووتیارانی هەرێمی کوردستان داومانەتە عێراق، دوای خەمڵاندنی لیژنەکە ئەگەر گرفت بۆ وەرگرتنی بەرھەمی جووتیارانی ھەرێمی کوردستان دروست نەکرێت، ئەمساڵ هەموو بەرهەمی گەنمی جووتیاران وەردەگیرێت". زۆزان کۆچەر، جێگری یەکەمی سەرۆکی لیژنەی کشتوکاڵ لەئەنجوومەنی نوێنەرانی عێراق ئەوەی بە ئاڤا نیوز ڕاگەیاند.

هۆکارە زانراوەکان: ساڵی ڕابردوو عێراق بە بیانووی ئەوەی بەرهەمی گەنمی  ساڵێک پێشترە، بەشێکی کەمی گەنمی جووتیارانی  هەرێمی کوردستانی وەرنەگرت، هۆکاری دووەم ئەوەیە %25 ـی ڕووبەری داچێنراو بە گەنم دەکەوێتە دامێنی کوێستانەکان، کە بەراورد بە دەشتیاییەکان درەنگتر بەرهەمەکەی پێدەگات.