بایدن لە دوایین خولەکدا ئیسرائیل لە وەڵامدانەوەی خێرای ئێران پەشیمان دەکاتەوە

ئاڤا نیوز

جۆ بایدن، سەرۆکی ئەمریکا لە دوایین خولەکدا بنیامین نەتانیاهۆ، سەرۆکوەزیرانی ئیسرائیلی لە وەڵامدانەوەی خێرای ئێران پەشیمان کردووەتەوە.

چیرۆکی سەرەکی: شەوی ڕابردوو لە وەڵامی هێرشە درۆنی و مووشەکییەکەی ئێران، ئیسرائیل هەڕەشەی تۆڵەکردنەوە و "وەڵامدانەوەی کەمەرشکێن"ی دەکرد، کابینەی جەنگی ئیسرائیلیش نەتانیاهۆی بۆ وەڵامدانەوە سەرپشک کرد، بەڵام پەیوەندییەکی تەلەفۆنی هەموو شتێکی گۆڕیوە.

ڕاگەیێنراوی فەرمی: دەستەی پەخشی ئیسرائیل (کان) ئاشکرای کردووە: وەڵامدانەوەی هێرشەکەی ئێران لە دوایین خولەکدا دوای پەیوەندییەکی تەلەفۆنی نێوان نەتانیاهۆ و بایدن هەڵوەشاوەتەوە.

ئەوەی پێویستە بیزانیت: دوای دەستپێکردنی هێرشەکەی ئێران، جۆ بایدن بە تەلەفون قسەی لەگەڵ بنیامین نەتانیاهۆ کرد و داوای لێ کرد ئەمریکا بۆ شەڕێکی گەورە پەلکێش نەکات، نیگەرانی واشنتنی لە وەڵامی خێرای ئیسرائیل بێ بیرکردنەوە لە لێکەوتەکانی نیشاندا.