جووتیارانی سەرگەڕان داوایەک ئاراستەی سەرۆکوەزیران بارزانی دەکەن

ئاڤا نیوز  

حەوت ڕۆژە بەهۆی ڕێگری  فیرقەیەکی سوپای عێراق، جووتیارانی چوار گوندی سنووری کەرکووک ناتوانن دروێنەی بەرهەمی گەنم بکەن، بە نووسراو داوایەک ئاراستەی سەرۆکوەزیران بارزانی دەکەن.

وێنە گەورەکە: بەهۆی ڕێگری لە جووتیارانی چوار گوندی سنووری سەرگەڕان مەترسی هەیە کە نزیکەی 600 جووتیار زەرەرمەند بن و زیاتر لە 60 هەزار دۆنم بەفیڕۆبچێت.

نووسراوی فەرمی: لە نووسراوی ئەو جووتیارانە کە ئاراستەی سەرۆکوەزیران بارزانی کراوە، هاتووە: ئێمە وەکو جووتیارانی سنووری ناحیەی سەرگەڕان داواکارین بەڕێزتان دەست تێوەردان بکەن لەو ڕێگریانەی لەلایەن سوپای عێراقەوە لێماندەکرێت، چونکە هەموو ساڵێک لەم کاتانەدا کۆمەڵێك عەرەبی هاوردە لەگوندەکانی (پەلکانە، شەناغە، گابەرەکە، خەرابە و سەربەشاخ ) دێنە سەر زەوییەکانمان لەهەمان کاتدا سوپای عێراق پاڵپشتیان دەکات.

باکگراوند:لەدوای 16ـی ئۆکتۆبەرەوە، لەسنووری سەرگەڕان و بەتایبەت گوندی پەڵکانە زۆرترین جار لەلایەن سوپای عێراقەوە ڕێگری لە جووتیاران دەکرێت لە دروێنەی زەوییەکانیان، چەند جارێکیش هێرشکراوەتە سەر هاونیشتمانیانی گوندەکە.