سەرۆک بارزانی پێشوازی لە شاندێکی خوێندنی باڵا و زانکۆکانی ئوردن دەکات

ئاڤا نیوز

لە سەڵاحەددین سەرۆک بارزانی، پێشوازی لە شاندێکی خوێندنی باڵا و زانکۆکانی ئوردن کرد کە پێکهاتبوو لە دکتۆر مەئمون ئەلدوبعی جێگری وەزیری خوێندنی باڵای ئوردن و سەرۆکەکانی نۆ زانکۆی ئەو وڵاتە و فوئاد ئەلمەجالی کۆنسوڵی گشتیی ئوردن لە هەولێر.

ڕاگەیێنراوی فەرمی: لە دیدارەکەدا شاندی میوان ڕۆڵی سەرۆک بارزانییان لە پڕۆسەی سیاسیی هەرێمی کوردستان و عێراق و قووڵترکردنی فەرهەنگی پێکەوەژیان و گەشەسەندنی هەرێمی کوردستان بەرز نرخاند و وێڕای جەختکردنەوە لە دۆستایەتی و پەیوەندییە مێژووییەکانی نێوان ئوردن و گەلی کوردستان ئامادەیی خۆیان پەرەپێدانی پەیوەندیی ئاکادیمی و هاوکاری و هەماهەنگیی نێوان زانکۆکانی هەردوولا دەربڕی.

ئەوەی پێویستە بیزانیت: لەو دیدارەدا سەرۆک بارزانی ئاماژەی بە پەیوەندییە مێژووییەکانی نێوان گەلی کوردستان و شانشینی ئوردن دا، سوپاسی شا عەبدوڵڵا پادشا و حکومەت و گەلی ئوردنی کرد کە لە قۆناغە جۆراوجۆرەکاندا هاوسۆز و یارمەتیدەری گەلی کوردستان بوونە، جەختیشی لە قووڵترکردنی پەیوەندی و دۆستایەتیی نێوان هەردوولا لە بوارە جۆراوجۆرەکاندا کردەوە.