سودانی و نەتەوە یەکگرتووەکان تاوتوێی پرسی کۆتاییهاتنی ئەرکەکانی یونامی لە عێراق دەکەن

ئاڤا نیوز

 

سەرۆکوەزیرانی عێراق و ئەمینداری گشتیی نەتەوە یەکگرتووەکان، کۆتاییهاتنی کارەکانی یونامیان لە عێراق تاوتوێ کرد.

 

بۆچی گرنگە؟: پێشتر سەرۆکوەزیرانی عێراق لە نامەیەکەدا کە ئاڕاستەى سکرتێرى گشتیی نەتەوە یەکگرتووەکانی کردبوو، ڕایگەیاندبوو "پێویستمان بە ئەرکى يونامى نەماوە و داوا دەکەین لە 31ـی کانوونى یەکەمى 2025 کۆتایى بە ئەرکەکانی بهێنرێت".

 

وێنە گەورەکە: یەکشەممە 26-5-2024، محەممەد شیاع سوودانی، سەرۆکوەزیرانی عێراق پەیوەندییەکی تەلەفۆنی لەلایەن ئەنتۆنیۆ گوتیرێز، ئەمینداری گشتی نەتەوە یەکگرتووەکان پێگەیشت.

 

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق ڕایگەیاند: لە پەیوەندییە تەلەفۆنییەکەدا گفتوگۆ لەسەر پەیامی عێراق سەبارەت بە کاتی کۆتاییهێنان بە کارەکانی نێردەی نەتەوە یەکگرتووەکان "یونامی" لە عێراق کرا.

 

زانیاریی زیاتر: سەرۆکوەزیرانی عێراق پێزانینی حکومەتی بۆ هەوڵەکانی نەتەوە یەکگرتووەکان و ئەرکەکەی لە عێراق دەربڕی و ستایشی بەرنامە و بەشدارییەکانی ڕێکخراوە نێودەوڵەتییەکان لە قۆناغە جیاوازەکاندا کرد.