زۆرینەی حاجییانی هەرێمی کوردستان فشاری خوێن و شەکرەیان هەیە

ئاڤا نیوز

 

سەرۆکی تیمی تەندروستیی هەرێمی کوردستان لە سعودیە، ئاماری 18 ڕۆژی ڕابردووی تەندروستیی حاجییان دەداتە ئاڤا و دەڵێت: بەشی زۆری حاجیان بەرزی فشاری خوێن و شەکرەیان هەیە.

 

وێنە گەورەکە: لە وەرزی حەجی ئەمساڵ، تیمێکی 21 کەسی لە دکتۆر و کارمەندانی تەندروستی لەگەڵ حاجییانی هەرێمی کوردستان لە سعودیەن.

 

لێدوانی فەرمی: د. دیار ئیبراهیم، سەرۆکی تیمی تەندروستیی هەرێمی کوردستان لە سعودیە بە ئاڤا نیوزی ڕاگەیاند: لەناو حاجییانی هەرێمی کوردستان تاوەکو ئێستا تەنیا یەک حاڵەتی جەڵتەی دڵ هەبووە، بەڵام ئێستا تەندروستی باشە. تەنیا یەک حاجی کێشەی گورچیلەی هەیە تاوەکو ئێستا چوار جار شووشتنی گورچیلەی بۆ کراوە. حاڵەتێکی شێرپەنجە هەیە و چەند جارێک ڕەوانەی نەخۆشخانە کراوە، بەڵام بەشی زۆری حاجییان کێشەی بەرزی فشاری خوێن و شەکرەیان هەیە.

 

زانیاریی زیاتر: سەرۆکی تیمە تەندروستییەکەی کوردستان ئاماژە بەوەش دەکات، ئەوەی لەناو حاجییان باوە ئازاری جومگەکانە، ئەویش بەهۆی گەرمیی کەشی دەرەوە و ساردی ژووری هۆتێلەکان ڕوودەدات.

 

ئەوەی پێویستە بیزانیت: حاجیان و تیمەکانی چاودێری تەندروستی ئامادەکاری دەکەن بۆ ڕۆیشتنە کێوی عەرەفە، هۆشداری تەندروستی ئەوەیە، ئەو کاتە بۆ ڕەوشی تەندروستیی حاجییان کاتێکی هەستیارە و داوا لە حاجیان دەکرێت پابەندی ڕێنماییەکان بن.