بەشێک لە هەنگەوانانی هەولێر ڕێگرییان لێدەکرێت هەنگەکانیان ببەنە کوێستانەکان

ئاڤا نیوز

 

بەشێک لە هەنگەوانانی سنووری هەولێر دەڵێن ڕێگرییان لێدەکرێت هەنگەکانیان ببەنە سنووری سیدەکان و باڵەکایەتی، بەگوتەی هەنگەوانێکی سنووری باڵەکایەتیش هۆکارەکەی نەخۆشی ئەو هەنگانەیە.

 

لێدوانی فەرمی: عارف شێروانی، سەرۆکی تۆڕی کۆمەڵەی هەنگەوانانی کوردستان بە ئاڤا نیوزی ڕاگەیاند: ئەمساڵ پێشبینی دەکەین بڕی بەرهەمی هەنگوین 50٪ کەم بکات، بەهۆی ئەو ڕێگرییەی لە هەنگەوانانی شاری هەولێر دەکرێت هەنگەکانیان ببەنە کوێستانەکانی سنووری پارێزگای هەولێر و سیدەکان و باڵەکایەتی.

 

بۆچوونی بەرامبەر: هەنگەوانێکی سنووری باڵەکایەتی دەڵێت ئەو هەنگانەی دەیهێنن نەخۆشن و بە مانگ سەری لێنادەن، لە ناوچەی ئێمە دایدەنێن کاتێک بەشداری پێشانگەیەکیش دەکەن ناڵێن هەنگوینی ناوچەکەی ئێمەیە.

 

چارەسەر: سەرۆکی کۆمەڵەی هەنگەوانانی کوردستان داوا لە سەرۆکوەزیران بارزانی دەکات چارەسەرێک بۆ ئەو پرسە بدۆزێتەوە.

 

بۆچی گرنگە: بەرهەمی هەنگوینی کوردستان بەپێی پشکنینە کیمایی، فیزیایی و مایکڕۆلۆجییەکان لە تاقیگە پێشکەتووەکانی وڵاتان بە باشترین هەنگوینەکانی جیهان هەژمار کراوە.

 

باکگراوند: بەپێی ئاماری تۆڕی هەنگەوانانی هەرێمی کوردستان، لە پارێزگای هەولێر زیاتر لە چوار هەزار هەنگەوان هەن کە خاوەنی 350 هەزار پورە هەنگن, زۆربەشیان لە وەرزی هاوین هەنگەکانیان دەگوازنەوە ناوچە کوێستانییەکان، ساڵی 2023 بەرهەمی هەنگوینی کوردستان گەیشتە زیاتر لە 600 تۆن.