ئەسعەد عیدانی: دیدارەکەمان لەگەڵ بارزانی زۆر ئەرێنی بوو

ئاڤا نیوز

 

سەرۆکی هاوپەیمانیی تەسمیم بەگرنگییەوە لە کۆبوونەوەکەی لەگەڵ سەرۆک بارزانی دەڕوانێت و بە کۆبوونەوەیەکی "سەروو ئەرێنی" ناوی دەبات.

 

وێنە گەورەکە: دوو ڕۆژە سەرۆک بارزانی بە سەردانێک لە بەغدایە، لە دووەم ڕۆژی سەردانەکەی ژمارەیەک دیدار و کۆبوونەوەی هەبوو، لەنێویاندا لەگەڵ ئەسعەد عیدانی، پارێزگاری بەسرە کۆبووەوە.

 

لێدوانی فەرمی: ئەسعد عیدانی لەبارەی کۆبوونەوەکەی لەگەڵ سەرۆک بارزانی بە ئاڤا نیوزی ڕاگەیاند: زۆر شتی هاوبەش لە نێوان بەسرە و هەولێر هەیە، هەر لە ڕۆژانی دژایەتی ڕژێمی پێشووەوە تا دامەزراندنی سیتمێکی دیموکراسی لە عێراق".

 

زانیاریی زیاتر: "ئەم هاوبەشیانە بووە هۆکاری کۆبوونەوەی سەرۆک بارزانی وەک یەکێک لە پایەکانی پڕۆسەی سیاسی لەگەڵ ئێمە وەک نوێنەری هەموو خەڵکی پارێزگای بەسرە، وا پێویست دەکات پەرە بەو هاوبەشییانە بدرێت، وەک لامەرکەزی ئیداری".

 

لەلایەکی دیکە: سەبارەت بە پەیوەندییەکانی بەسرە و هەولێر، عیدانی ڕایگەیاند: "پەیوەندییەکە پێشینەی هەیە، ئەو ڕۆژەی کە خەڵکی بەسرە بەشێوەیەکی جەماوەری و خۆرسکانە پێشوازییان لە مەلا مستەفا بارزانی کرد، وەک ئەوەی لە کوردستان پێشوازی لێبکرابێت".