بۆچی نرخی گۆشتی سوور لە هەرێمی کوردستان دانابەزێت؟

ئاڤا نیوز

 

لە ماوەی سێ ڕۆژی ڕابردوودا نرخی گۆشتی سوور لە دووکانەکانی گۆشتفرۆشی، دوو بۆ سێ هەزار دیناری چووەتەسەر، بازرگانێکی ئاژەڵ هۆکاری گرانبوونی نرخەکەی ئاشکرا دەکات.

 

وێنە گەورەکە: ماوەی دوو ساڵە لەپێناو سەقامگیریی نرخی گۆشتی سوور، حکومەتی هەرێمی کوردستان بڕیاریداوە گومرگ و کەرەنتینکردن لەسەر ئەو ئاژەڵانەی دەهێنرێن هەڵبگیرێت، بەڵام نرخەکەی دانەبەزیوە.

 

لێدوانی فەرمی: ڕۆستەم مەمۆ، بازرگانی ئاژەڵ بۆ ئاڤا نیوز قسەی کردووە و دەڵێت: هەموو بەیانییەک بەر لەوەی قەسابەکانی ناوخۆ بچن بۆ مەیدانی ئاژەڵان، زیاتر لە 20 بارهەڵگر ئامادەکراوە و دەڕوات بۆ بەغدا، ئەمە هۆکاری سەرەکیی دانەبەزینی نرخی گۆشتە.

 

زانیاریی زیاتر: ئەو بازرگانە ئەوەشی گوت، ئێستا لە شارەکانی ناوەڕاست و خوارووی عێراق کاتی عاشورایە و ژمارەیەکی زۆرتر سەرئاژەڵ لە مەیدانی ئاژەڵانی هەولێرەوە دەڕوات، جگە لەوە بەرزبوونەوەی نرخی دۆلار کاریگەری هەیە.

 

ئەوەی پێویستە بیزانیت: ئەمڕۆ سێشەممە، لە گۆشتفرۆشییەکانی هەولێر، کیلۆیەک گۆشتی کاوڕ تا 24 هەزار دینار و گۆشتی گوێرەکە 21 هەزار دینار بەرز بووەتەوە.