ئاسایش ئەو هاککەرانە دەستگیر دەکات کە داوای باڵانس لە هاووڵاتییان دەکەن

ئاڤا نیوز

تیمێکی هاککەر بەبەرفراوانی کار لەسەر هاککردنی هاووڵاتیان دەکەن، ئاسایشی هەولێریش ئاماژە بەوەدەدات کە بەشێکیان دەستگیرکراون.

وێنە گەورەکە: ئەو تیمە هاککەرە ژمارەیەکی زۆر بەکارهێنەری فەیسبووکیان لە هەرێمی کوردستان هاک کردووە، بە ناوی ئەوانەوە داوای ناردنی کارتی مۆبایلیان لە هاوڕێکانیان کردووە.

لێدوانی فەرمی: موقەدەم ئەردەلان، گوتەبێژی ئاسایشی هەولێر بە ئاڤا نیوزی گوت: "لەم ماوەیەدا چەند کەسێک لەسەر ئەو بابەتە دەستگیرکراون، هەروەها ئەو هاووڵاتییانەی کە هەژمارەکانیان هاککراوە دەتوانن لە ئاسایش سکاڵا بکەن ئێمەش دەستگیریان دەکەین و کەیسەکە دەگوازینەوە بۆ دادگە".

ئەوەی پێویستە بیزانیت: بەگوێرەی ماددەی دوو لە یاسای قەغەدەکردنی خراپ بەکارھێنانی ئامێرەکانی پەیوەندی کردن، ئەو تۆمەتبارانە سزا دەدرێن بە زیندانی کردن کە لە شەش مانگ کەمتر و لە پێنج ساڵ زیاتر نەبێت، هاوکات سزای داراییش دەدرێن کە نابێت لە یەک ملیۆن کەمتر و لە پێنج ملیۆن زیاتر بێت.