تورکیا لە یەک شەودا 25 شوێن لە هەرێمی کوردستان بۆردوومان دەکات

ئاڤا نیوز 

وەزارەتی بەرگریی تورکیا ڕایگەیاند، شەوی ڕابردوو فڕۆکە جەنگییەکانیان 25 شوێنیان بەهۆی هەبوونی بنکە و بارەگاکانی پەکەکە لە چیاکانی گارە، قەندیل و ئاسۆس بۆردوومان کردوون. 

وێنە گەورەکە: سوپای تورکیا لەپاڵ هێرشی زەمینی، لەڕێگەی فڕۆکە جەنگییەکانەوە بۆردوومانەکانی لە ناوچە سنوورییەکانی هەرێمی کوردستان بۆ سەر بنکە و بارەگاکانی پەکەکە چڕکردوونەتەوە، بەو هۆیەوە سەدان گوند چۆڵکراون و زەرەر و زیانێکی زۆری ماددی  و گیانی بەر  دانیشتووانی ناوچە سنوورییەکان گەیشتووە. 

 

ڕاگەیێنراوی  فەرمی: وەزارەتی بەرگریی تورکیا ڕایگەیاندووە: "لە ئۆپەراسیۆنی 26ی تەممووزدا لە ناوچەکانی گارە، قەندیل و چیای ئاسۆس 25 ئامانج بۆردوومان کراون، لە بۆردوومانەکاندا ڕوێوشوێنی پێویست بۆ پاراستنی هاووڵاتییان، ناوچە مێژووی و کولتوورییەکان، ڕەز و باخی گوندەکان گیراوەتەبەر". 

 

زانیاریی زیاتر: وەزارەتی بەرگریی تورکیا باسی لەوە کردووە بەهۆی بۆردوومانەکان ژمارەیەک گەریلای  پەکەکە کوژراون، بەڵام ئاماژەی بە هیچ ژمارەیەک نەکردووە.

 

بۆچوونی لایەنی بەرامبەر: میدیای نزی لە پەکەکە ڕایگەیاند، لە شەوی 26 لەسەر 27 ی تەممووزدا، فڕۆکەکانی تورکیا 22 جار ناوچە سنوورییەکانیان بۆردوومان کردوون، بەڵام ڕەتی دەکەنەوە هیچ کوژراوێکیان هەبووبێت.