ئەمریکا و سێ وڵاتی دیکەی ئەوروپی سزای نوێ بەسەر ئێران دەسەپێنن

ئاڤا نیوز

بەتۆمەتی ناردنی مووشەکی بالیستیک بۆ ڕووسیا تا لە شەڕی دژی ئۆکراینا بەکاریبهێنێت، هەریەکە لە ئەمریکا، بەریتانیا، ئەڵمانیا و فەرەنسا سزای نوێیان بەسەر ئێراندا سەپاند.

وێنە گەورەکە: ئەمریکا و وڵاتانی ئەوروپا، ئێران بە پشتیوانیکردنی ڕووسیا لە شەڕی دژی ئۆکراینا تۆمەتبار دەکەن و باس لەوە دەکەن، تاران مووشەک و درۆن بە مۆسکۆ دەدات، لەسەر ئەو بنەمایە و لە دوایین ڕێکاریاندا دژی تاران، سزایان بەسەر 10 کەس و شەش دامەزراوەدا سەپاند کە بنکەیان لە ئێران و ڕووسیا هەیە.

ڕاگەیێنراوی فەرمی: ئەنتۆنی بلینکن، وەزیری دەرەوەی ئەمریکا لە کۆبوونەوەیدا لەگەڵ دەیڤد لێمی، هاوتا بەریتانییەکەی ڕایگەیاند، ئەمریکا سزای دیکە بەسەر ئێراندا دەسەپێنێت، هاوکات وەزیری دەرەوەی بەریتانیاش هەنگاوەکەی ئێرانی بە "مایەی نیگەرانی" ناوبرد و گوتی: "بەریتانیا و ئەمریکا لەسەر ئەم بابەتە هەماهەنگی دەکەن".

 

لەلایەکی دیکەوە: کاتژمێرێک پاش ئەوەی ئەنتۆنی بلینکن باسی سزاکانی کرد، وەزارەتی گەنجینەی ئەمریکا سزای بەسەر چوار کەشتیدا سەپاند کە ڕێگەیان بە گەیاندنی فڕۆکەی بێفڕۆکەوان و مووشەکی بالیستیکی دوورهاوێژ بۆ ڕووسیا دەدا، فەرەنسا و ئەڵمانیاش پشتگیری خۆیان بۆ ئەو بڕیارە دووپاتکردەوە و بڕیاری سەپاندنی سزایان بەسەر ئێراندا خستە بواری جێبەجێکردنەوە.