پێنج قاچاخچی ماددەی هۆشبەر لە سنووری ئوردن دەکوژرێن

ئاڤا نیوز

سوپای ئوردن کوشتنی پێنج قاچاخچیی ماددەی هۆشبەر و بریندارکردنی چواری تری ڕاگەیاند، لەکاتێکدا ویستوویانە لە سووریاوە ماددەی هۆشبەر ببەنە وڵاتەکەوە.

چیرۆکی سەرەکی: بەیانی ئەمڕۆ یەکشەممە تۆڕێکی قاچاخچی هەوڵیان داوە ماددەی هۆشبەر لە سووریاوە بۆ ئوردن بگوازنەوە، بەڵام ئاشكرابوونە و کەوتوونەتە بۆسەی سوپای ئوردن.

وێنە گەورەکە: سنووری نێوان ئوردن و سووریا ئێستا زۆر مەترسیدار بووە و ئوردن بووەتە ڕێڕەو بۆ وڵاتانی کەنداو، چەندین جۆری قاچاخچێتی تێدا دەکرێت و یەکێک لە باوترینیان ماددەی هۆشبەرە بەتایبەت کاپتاگۆن. حکومەتی ئوردنیش هۆشداری  داوە "بە مشتی ئاسنین" بەرەوڕووی هەر کەسێک دەبێتەوە کە ئاسایشی نەتەوەیی وڵاتەکە بخاتە مەترسییەوە.

لێدوانی فەرمی: سوپای ئوردن لە بەیاننامەیەکدا ڕایگەیاند: "ئۆپەراسیۆنەکە بە کوشتنی پێنج قاچاخچی و برینداربوونی چواری تر و دەستگرتن بەسەر بڕی زۆری ماددەی هۆشبەردا کۆتایی هات".

لەلایەکی دیکەوە: دوێنێ ئوردن بۆ تاوتوێکردنی ڕێگرتن لە گواستنەوەی ماددەی هۆشبەر کۆبوونەوەیەکی بۆ وەزیرەکانی ناوخۆی سووریا و عێراق و لوبنان و ئوردن ڕێکخست، هەموو لایەنەکان ڕێککەوتن پەیوەندیی هاوبەشیان هەبێت بۆ ئاڵوگۆڕکردنی زانیاری لە بارەی ئەم جۆرە بازرگانییەوە.