حووسییەکان بۆ کەشتییە بازرگانییەکان: هێرش دەکەینە سەرتان لەگەڵ ڕێزدا

ئاڤا نیوز

 

حوسییەکانی یەمەن لە ڕێگەی ئیمەیلەوە هەڕەشە لە کۆمپانیای کەشتییە بازرگانییەکان دەکەن و پێیان ڕادەگەیێنن کە هێرشیان دەکەنەسەر.

 

پێدراوە ڕاستییەکان: ئیمەیلەکە بە زمانی ئینگلیزی نووسراوە و ئاراستەی کۆمپانیایەکی کەشتیوانیی یۆنانی کراوە کە لە دەریای سوور و کەنداوی عەدەن هاتووچۆ دەکەن. لە بەشێکی ئیمەیلەکەدا هاتووە "هێرش دەکرێتە سەرتان، لەگەڵ ڕێزدا."

 

زانیاری زیاتر: لە ئیمەیلەکەدا پاساوی هێرشەکە بەو جۆرە باس کراوە کە لە بەر ئەوەیە کەشتییەکە لە بەندەرێکی ئیسرائیل وەستاوە و ئەمەش پێچەوانەی ڕێکارەکانی حوسییەکانە.

 

ڕاگەیێنراوی فەرمی: حوسییەکان ڕایانگەیاندووە بۆ بەرگریکردن لە خەڵکی غەززە هێرش دەکەنە سەر ئەو کەشتییانەی کە خزمەت بە بەرژەوەندییەکانی ئیسرائیل دەکەن.

 

باکگراوند: لەدوای هێرشی لەناکاوی حەماس بۆسەر ئیسرائیل و دواتر وەڵامدانەوەی تەلئەڤیڤ بە بۆمبارانکردنی تەواوی کەرتی غەززە، گرووپە چەکدارەکانی سەر بە ئێران بەشێوەی ناراستەوخۆ هاتنە نێو شەڕەکەوە و ناوە ناوە بە درۆنی  و مووشەک هێرشدەکەنە سەر بەرژەوەندییەکانی ئیسرائیل و ڕۆژائاوا.