پەیامێک لە مەسرور بارزانییەوە لەبارەی پرۆژەی هەژماری من

ئاڤا نیوز
 

مەسرور بارزانی لەبارەی پرۆژەی هەژماری من پەیامێک ئاراستەی مووچەخۆران دەکات و ڕایدەگەیێنێ: "ئەو لایەنانەی دژی دەوەستنەوە، ئەوانەن کە دەترسن لەوەی هاووڵاتی خاوەن ئیرادە و بڕیار بێت. دەیانەوێت هاووڵاتی هەمیشە گیرۆدەی دەستی ئەوان بێت، ئەوان بچن مووچەیان بۆ دابین بکەن و ئەگەر بە قسەی ئەوان نەکەن، مووچەیان لێ ببڕن".

 

وێنە گەورەکە: ئەمڕۆ چوارشەممە، جێگری سەرۆکی پارتی لەمیانی بانگەشەی لیستی 190ـی پارتی لە سۆران، باسی لە خزمەتگوزارییە گرنگەکانی حکومەتی هەرێمی کوردستان کرد و وەکو پرۆژەیەکی سەرکەوتوو ئاماژەی بە پرۆژەی هەژماری من کرد.

لێدوانی فەرمی: مەسرور بارزانی، جێگری سەرۆکی پارتی ڕایگەیاند: "دروستکردنی هەژماری من بەشێوەیەکی یاسایی و دادپەروەرانە بۆ هەندێک لایەن بووەتە جێگەی مەترسی، چونکە وا دەزانن لە دەسەڵاتی ئەوان کەم دەکاتەوە و ناتوانن چیتر بە ترساندن و ڕاگرتنی مووچە هیچ وەلائێک بۆ خۆیان بکڕنەوە، بۆیە دژی پرۆژە خزمەتگوزارییەکان دەوەستنەوە."

ئەوەی پێویستە بیزانیت:  "پرۆژەی هەژماری من و خزمەتگوزارییەکانی دیکە پرۆژەی هاووڵاتیانن، بۆ ئەوەی بتوانن لەکاتی خۆیدا مووچەکانیان وەربگرن و خاوەنی بڕیاری خۆیان بن، هاوکات هیچ لایەنیکی سیاسیی نەتوانێت دەست بەسەر مووچەکانیاندا بگرێت". جێگری سەرۆکی پارتی وادەڵێت.

لەلایەکی دیکەوە: مەسرور بارزانی لە وەڵامی باڤڵ تاڵەبانی، سەرۆکی یەکێتی کە داوای لە مووچەخۆرانی پارێزگاکانی سلێمانی و هەڵەبجە کرد خۆیان لە هەژماری من تۆمار نەکەن و لەبری ئەوە تەوتین بکەن، داوای لە مووچەخۆرانی ئەو سنوورە کرد لە "دز و جەردە" نەترسن، خۆیان چیان بووێت دەتوانن بیکەن و کەس ناتوانێت ڕیگەیان لێ بگرێت.

باکگراوند: هەژماری من پرۆژەی حکومەتی هەرێمی کوردستانە بۆ بەبانکیکردنی مووچە، تاوەکو تاوەکو ئێستا 600 هەزار مووچەخۆر لە پرۆژەکە هەژماریان بۆ کراوە و ئەم مانگە 130 هەزار کەس مووچەیان پێ وەرگرت.