ئیسرائیل کوژرانی سینواری پشتڕاست کردەوە

ئاڤا نیوز

 

بە گوێرەی میدیاکانی ئیسرائیل، ئامادەکاریی دەکرێت بۆ ئەوەی بنیامین نەتانیاهۆ، سەرۆکوەزیرانی ئیسرائیل، لە پەیامێکی ڕۆژنامەوانیدا هەواڵی کوژرانی یەحیا سینوار، سەرکردەی حەماس، پشتڕاست بکاتەوە دوای ئەوەی وەزیری دەرەوەی وڵاتەکە و وتەبێژی سوپا هەواڵەکەیان ڕاگەیاند.

 

وێنە گەورەکە: کابینەی جەنگی ئیسرائیل ئێوارەی ئەمڕۆ هەواڵی کوشتنی سێ کەسی لە شاری ڕەفەح لە کەرتی غەززە بڵاوکردەوە و ڕایگەیاند، بە ئەگەری زۆر یەکێک لە کوژراوەکان سینوارە و پشکینینی دی ئێن ئەی بۆ تەرمەکەی دەکرێت تا بە تەواویی دڵنیا ببنەوە. 

 

لێدوانی فەرمی: ئیسرائیل کاتز، وەزیری دەرەوەی ئیسرائیل، هەواڵی کوژرانی یەحیا سینوار، سەرکردەی حەماسی پشتڕاست کردەوە.

 

لە پەیامێکدا کە بۆ هاوتاکانی لە دەیان وڵات نێردراوە، کاتز نووسیویەتی: سینوار بەرپرسیاری هێرشەکەی حەوتی ئۆکتۆبەرە و لەلایەن هێزەکانی ئیسرائیلەوە کوژراوە.

 

ڕاگەیێنراوی فەرمی: دوای وەزیری دەرەوە، سوپای ئیسرائیلیش کوژرانی سینواری پشتڕاست کردەوە. 

 

باکگراوند: یەحیا سینواری تەمەن 61 ساڵ، لە سەرەتای 1980کانەوە پەیوەندیی بە بزووتنەوەی حەماسەوە کردووە و لە ساڵی 2017ـەوە بەرپرسی حەماسە لە کەرتی غەززە. 

ئەوەی پێویستە بیزانیت: دوای کوژرانی ئیسماعیل هەنیە، سەرۆکی مەکتەبی سیاسیی حەماس لە تاران لە ڕێکەوتی 31-7-2024، سینوار جێگەی گرتەوە.

ئەمەش بزانە: ئیسرائیل لەو باوەڕەدایە کە سینوار داڕێژەری پلانی هێرشەکەی حەوتی ئۆکتۆبەری 2023ـیە و تاکە سەرکردەی حەماسە کە تەلئەڤیڤ ناوی لێناوە 'مێشکی جەنگ'.