ئەمریكا ستایشی پرۆسەی هەڵبژاردنی پەرلەمانی كوردستان دەكات

ئاڤا نیوز

 

ئەمرۆ سێشەممە سەرۆكوەزیران مەسرور بارزانی پێشوازیی لە ئێلینا ڕۆمانۆوسكى، باڵیۆزی ئەمریكا لە عێراق کرد و چەند پرسێكیان تاوتوێ كرد.

 

زانیاریی بەدەستهاتوو: بابەتی سەرەکیی گفتوگۆی نێوان سەرۆكوەزیران مەسرور بارزانی و باڵیۆزی ئەمریكا، هەڵبژاردنی پەرلەمانی کوردستان و ئەنجامەکانی بوو، باڵیۆزی ئەمەریکا پیرۆزبایی سەرکەوتنی هەڵبژاردنی لە سەرۆكوەزیران مەسرور بارزانی كرد و ئاماژەی بەوەدا، "پرۆسەکە بە شێوەیەکی ڕێک وپێک و لە کەشێکی ئاسایی و ئاشتیانە بەڕێوەچوو و ڕێژەی بەشداریش بەرز بوو".

 

لەلایەكی دیكەوە: هەردوولا هاوڕابوون لە سەر گرنگیی دەستکردن بە ڕێکكارەکانی پێکهێنانی کابینەی نوێ و لێکتێگەیشتنی لایەنە سیاسییەکانی هەرێمی کوردستان لەوبارەیەوە. 

 

زانیاریی زیاتر: هەوڵەکانی دەستپێکردنەوەی هەناردەکردنی نەوتی هەرێمی کوردستان و پێویستیی چارەسەرکردنی کێشەکانی بەردەم پرۆسەی هەناردەکردنەوەی نەوت تەوەرێکی دیکە کۆبوونەوەکەی نێوان سەرۆکوەزیران مەسرور بارزانی و ئەلینا ڕۆمانۆوسکی بوون.