حیزبوڵڵای لوبنان لە 24 کاتژمێردا 18 هێرش دەکاتە سەر ئیسرائیل

ئاڤا نیوز 

حیزبوڵڵای لوبنان ڕایدەگەیەنێت، ئەمڕۆ هەینی بە مووشەك بنکەیەکی هێزی دەریایی ئیسرائیل و فڕۆکەخانەیەکی سەربازی لە نزیک شاری حەیفا بۆردوومان کردووە. بەمەش ژمارەی هێرشەكانی لە ماوەی 24 كاتژمێری ڕابردوودا گەیشتووەتە 18 جار.

وێنە گەورەكە: ماوەی حەوت هەفتەیە شەڕ لەنێوان سوپای ئیسرائیل و حیزبوڵڵا لە ناوچە سنوورییەكانی باشووری لوبنان و باكووری ئیسڕائیل بەردەوامە، هەردوولا بە چەكی جۆراوجۆر یەكتر بەئامانج دەگرن.

ڕاگەیێنراوی فەرمی: حیزبوڵڵای لوبنان ڕایگەیاندووە، زنجیرەیەك هێرشیان كردووەتە سەر چەند ئامانجێكی ئیسرائیل كە بریتین لە: دوو بنكەی سەربازی، چوار شوێنی نیشتەجێبوونی سەربازان، 10 ناوچەی گردبوونەوەی سەربازانی سوپای ئیسڕائیل و دوو سەربازگە لە ڕامیم و هارمۆن.

زانیاریی زیاتر: دووجار بنكەی دەریایی ستێلا ماریس لە باکووری شاری حەیفا مووشەكباران كراوە، كە بنكەیەكی ستراتیژییە بۆ چاودێریكردن و كۆنتڕۆڵكردنی دەریایی لە كەناراوەكانی باكووری ئیسرائیل. هەروەها بنكەی ئەلیاكیم لە باشووری حەیفا كراوەتە ئامانج، كە كەمپی مەشق و ڕاهێنانی سەربازانی سوپای ئیسرائیلی لەخۆگرتووە.