پارەی کارمەندانی سەر سندووقەکانی دەنگدان دابەش دەکرێت

ئاڤا  نیوز

 

کۆمیسیۆنی هەڵبژاردنەکان هەفتەی داهاتوو پارەی کارمەندانی سەر سندووقەکانی دەنگدان خەرج دەکات، پارەکەش لەڕێگەی بانکە حکومییەکان و و لقەکانیان دابەش دەکرێت.

وێنە گەورەکە: لە پرۆسەی هەڵبژاردنی پەرلەمانی كوردستان کە لەلایەن کۆمیسیۆنی هەڵبژاردنەکانی عێراق سەرپەرشتی کرا، 42 هەزار كەس وەك كارمەند لەسەر سندووقەكانی دەنگدان بوون،  كۆمیسیۆن 150 بۆ 250 هەزار دیناریان پێدەدات. کارمەندە یەدەگەکانیش لەنێوان 50 بۆ 100 هەزار دینار وەردەگرن.

 

لێدوانی فەرمی: نەبەرد عومەر، سەرۆکی دەستەی هەڵبژاردنی کوردستان لە کۆمیسیۆنی عێراق بە ئاڤا نیوزی گوت: تاوەکو ئێستا وردبینیکردن لە لیستی ناوەکان تەواو نەبووە و چەند ڕۆژێکی دیکەی دەوێت، چونکە دەبێت ناوی ئەو کارمەندانەی دەوامیان نەکردووە دەربهێنرێت. 

 

زانیاریی زیاتر: نەبەرد عومەر دەڵێت، هەفتەی داهاتوو دەست بە دابەشکردنی پارەکەیان دەکرێت. پارەکە لەڕێگەی بانکە حکومییەکان و لقەکانیان دابەش دەکرێت و هەر کارمەندێک دەتوانێت سەردانی نزیکترین بانکی حکومی بکات.