وەزارەتی بەرگریی تورکیا داخستنی ناوچەی زاپی بە ڕووی پەکەکەدا ڕاگەیاند

ئاڤا نیوز 
 

وەزارەتی بەرگریی تورکیا لە کۆنگرەی ڕۆژنامەوانیی هەفتانەی وەزارەتەکەیدا باسی لە کۆنترۆڵکردنی سنووری نێوان هەرێمی کوردستان و تورکیای کرد، ئاماژەی بەوەدا ناوچەی ئۆپەراسیۆنی زاپیان داخستووە.

 

ئەوەی پێویستە بیزانیت: ئەم ڕاگەیێنراوە لە کاتێکدایە دوو ڕۆژ لەمەوبەر یەشار گولەر، وەزیری بەرگریی تورکیا ڕایگەیاند، ناوچەی ئۆپەراسیۆنی پەنجە-کلیت بە ڕووی پەکەکەدا بە تەواوی داخستووە کردووە.

ڕاگەیێنراوی فەرمی: زەکی ئاکتورک، بەرپرسی ڕۆژنامەوانی وەزارەتەکە ڕایگەیاند، "لە چوارچێوەی ستراتیژی دەستەبەرکردنی ئاسایشی سنوورەکانمان لە ئایندە و نەهێشتنی تیرۆر لە سەرچاوەکەیەوە، پەنجە-کلیت لە زاپ داخرا. بە خۆبەخشی و هەوڵی گەورەی سوپای قارەمانمان، و ئاسایشی تەواوی سنووری عێراق لە ئەودیوی سنوورەوە دامەزرا".

 

ژمارەکان وادەڵێن: هەر بە گوێرەی زانیارییەکانی وەزارەتی بەرگری تورکیا، لەماوەی 24 کاتژمـێری ڕابردوودا، 72 چەکداری پەکەکە لەو سنوورانە کوژراون، لە سەرەتای ساڵەوە دوو هەزار و 611  چەکداری پەکەکە کوژراون.

هەروەها، سێ هەزار و 146 مین و تەقمەنی پوچەڵ کراونەتەوە، هەزار و 317 مۆڵگە بۆردوومان کراوە، دەست بەسەر 948 چەکی قورس و دوو هەزار و 408 چەکی سووک دا گیراوە.

 

باکگراوند: ئۆپەراسیۆنی پەنجە -کلیت کە لە 17ی نیسانی 2022 لە سنووری نێوان هەرێمی کوردستان و تورکیا دەستیپێکرد، سوپای تورکیا ڕۆژانە مۆڵگە و پێگەکانی پەکەکە لەو سنوورە بۆردوومان دەکات.